Б.Навчаа: Х.Нямбаатар гэж бичих л юм бол хорино гэж айлгасан

Жүжигчин Б.Навчаа ХЗДХ-ийн сайд Х.Нямбаатарын боловсруулсан Эрүүгийн хуулийг эсэргүүцэн бичсэнийхээ төлөө ял авахад хүрчээ. Тэрээр энэ тухайгаа өөрийн цахим хуудаснаа нийтэлж, энэ нь олон нийтийн анхаарлыг ихээхэн татаад байгаа юм. 

Тэрээр, "Нямбаатар сайдын боловсруулсан хуулийг эсэргүүцэж байна. Яаж тэнэгтэхээрээ 14-16 насны охидод бэлгийн дарамт үзүүлсэн бол харилцан бэлгийн харилцаанд орсон болж торгох хууль баталж байгаа юм бэ? Энэ хуулийг эсэргүүцэж, охидоо хамгаалахын тулд реклам болон шторк хийж эсэргүүцэх тул 14-16 насны 50 охин надтай нэгдэж, зураг авалтад орооч..." хэмээн өөрийн цахим хуудаснаа бичсэн байна. Гэтэл түүнийг ийнхүү үзэл бодлоо илэрхийлснийх нь дараагаар цагдаагаас дуудаж, байцаан улмаар Эрүүгийн хуулийн 13,14 дэх заалтаар ял оноожээ.

Уг асуудлаар нь жүжигчин Б.Навчаагаас тайлбар авах гэсэн ч тэрээр, "Би ярилцлага өгч болохгүй. Ярилцлага өгвөл миний ялыг нэмнэ гэсэн" хэмээгээд утсаа тасалсан юм. Улмаар түүнийг "Нямбаатар гэж бичих л юм бол хорино хэмээн сүрдүүлсэн" талаар ч жиргэжээ.

Өөрөөр хэлбэл, Хуульзүйн сайд Х.Нямбаатар өөртэй нь холбоотой жижиг сажиг мэдээ, мэдээлэл бүрт ийн хариу "арга хэмжээ авч", цаашлаад өөрийн хүч чадлаа харуулж буйн жишээ энэ асуудал болж байна. Жүжигчин Б.Навчаагийн нийтэлсэн сэтгэгдэл дор мөн нэгэн эмэгтэйн дүү мөн "Нямбаатарт дургүйгээ илэрхийлсэн"-ний төлөө байцаагдаж, цагдаад дуудагдаж буй тухайгаа бичжээ. 

Эрүүгийн хуулийн 12,5 дахь зүйлд:

“...хохирогчийг 14 насанд хүрсэн, 16 насанд хүрээгүй болохыг мэдэх боломжтой байсан, эсхүл мэдсээр байж бэлгийн харьцаанд орсон бол 450-5400 нэгжтэй тэнцэх хэмжээний төгрөгөөр торгох, эсхүл зургаан сараас нэг жил хүртэл хугацаагаар зорчих эрхийг хязгаарлах, эсхүл зургаан сараас нэг жил хүртэл хугацаагаар хорих ял шийтгэнэ” гэх заалт оруулсан байдаг. Өөрөөр хэлбэл, 14 настай хүүхэдтэй бэлгийн харьцаанд орчихоод торгуулиад л өнгөрөх болж байгаа юм. Үүнийг олно нийт ихээхэн эсэргүүцсээр байгаа билээ. 

Харин уншигч та бүхэн хэргийн талаар илүү мэдээлэл авъя гэвэл хуульч Ү.Амарбатын тайлбарыг уншаарай.