Сенегал: Хүүхдүүдээ Европ руу цагаачлахыг шаардсан иргэдийг баривчилжээ
Хөвгүүдээ далайгаар дамжин Европ руу цагаачлахыг шаардсан гурван эрд Бүгд Найрамдах Сенегал Улсын шүүх хоёр жилийн хорих ял оноожээ.
Шүүхээс тэднийг бусдын амь насанд аюул учруулсан хэрэгт гэм буруутайд тооцон, хоёр жилийн хорих ялаар шийтгэсэн хэдий ч 23 сарын ялыг нь түдгэлзүүлсэн байна.
Эрэг хавийн Мбур хотод ялаа сонссон хүмүүсийн нэг нь Мамаду Ламин Фэй бөгөөд түүний өсвөр насны хүү нь завиар цагаачилж яваад амиа алдсан аж. Ламин Фэй хууль бус тээвэрлэгчид 450 орчим ам.доллартой тэнцэх хэмжээний мөнгө төлөөд, хүүгээ Испани руу илгээжээ.
Тэрээр гэрчийн мэдүүлэг өгөхдөө хүүгийнхээ амь насанд аюул учруулахыг огтхон ч хүсээгүй, харин түүнд илүү сайхан ирээдүйг өгөхийг л хүссэн хэмээсэн байна. Хүү нь Италид очиж, хөлбөмбөгөөр хичээллэхийг хүсэж байсан гэж орон нутгийн хэвлэлүүд мэдээлж байгаа юм.
Гэвч уг залуу харамсалтайгаар нас барсан болох мэдээ өнгөрөгч арваннэгдүгээр сард ил болоход аавыг нь баривчилсан байна. Харин Ламин Фэйгийн хүүтэй хамт явсан бусад хоёр хөвгүүн азаар амьд үлдэж, Сенегалд буцаж ирсэн гэнэ.
Энэ оны аравдугаар сараас арваннэгдүгээр сарын хооронд Сенегалын хууль бус цагаачдын олон зуу нь замдаа амиа алдсан хэрэг бүртгэгдсэн билээ. Тус улсын иргэдийн олонх нь энэхүү шүүхийн шийдвэр эцэг эхчүүдийг үр хүүхдүүдээ далайн аюултай аялалд гаргаж, Европ руу цагаачлуулахаас сэргийлж чадна гэж найдаж байгаа аж.
Эх сурвалж: Associated Press
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.