МҮОНТВ-ийн сэтгүүлч Б.Пүрэв нарын таван хүнийг зөвшөөрөлгүйгээр жагсаал цуглаан зохион байгуулсан гэх үндэслэлээр Чингэлтэй дүүргийн цагдаагийн алба хаагчид, дотоодын цэргийн бие бүрэлдэхүүн өнөөдөр 12.10 цагт дайчлан баривчилсан.

Цагдаагийн алба хаагчид сэтгүүлч Б.Пүрэвийг Чингэлтэй дүүргийн цагдаагийн хэлтсийн байранд аваачиж хоёр цагийн турш байцаалт мэдүүлэг авсныхаа дараа суллажээ.

Хуульд заасан ямар үндэслэл шаардлагын дагуу баривчилсан болохыг Б.Пүрэвээс асуухад “Зөвшөөрөлгүйгээр жагсаал цуглаан зохион байгуулсан гэх үндэслэлээр дайчлан баривчилж, Зөрчлийн тухай хууль болон Гамшгийн тухай хуульд заасан хариуцлага тооцно гэж байх шиг байна. Надаас шаардлагатай тайлбар мэдүүлгээ авсныхаа дараа хэрэг нээх саналаа прокурортоо хүргүүлнэ гэж байсан. Надтай хамт МҮОРТВ-ийн хоёр хүн, биднийг дэмжихээр ирсэн иргэний нийгмийн байгууллагын хоёр хүнийг нийтдээ таван хүнийг баривчилсан. Мөн бидний барих гэж байсан гэрийг хурааж авсан” гэв.

---