БНСУ 44 сая иргэндээ коронавирусийн вакцин захиалжээ

Өмнөд Солонгос улс дэлхийн дөрвөн эм үйлдвэрлэгч компани болон Дэлхийн эрүүл мэндийн байгууллагын "COVAX" вакцины төслийн хүрээнд нийт 44 сая иргэндээ хүрэлцэх коронавирусийн эсрэг вакцины захиалгыг баталгаажуулсан гэж тус улсны Эрүүл мэндийн яам өнгөрөгч мягмар гарагт мэдэгджээ.

Тус улсын Эрүүл мэнд, нийгмийн хамгааллын яамнаас хүн амын 34 сая иргэндээ зориулан Их Британийн "AstraZeneca Inc" болон АНУ-ын "Pfizer", "Johnson & Johnson's Janssen", "Moderna" зэрэг дөрвөн эм үйлдвэрлэгчээс 64 сая тун вакциныг урьдчилан захиалсан байна.

Харин ДЭМБ-ын "COVAX" хөтөлбөр Өмнөд Солонгосын нийт 10 сая хүнд зориулсан "AstraZeneca", "Pfizer", "Sanopi" зэрэг компанийн вакцинуудыг нийлүүлэх юм.

"AstraZeneca", "Pfizer", "Moderna" компаниудын вакцин нь хоёр удаагийн тарилгатай тул тус бүрээс нь 20 сая тунг захиалсан бол нэг л тарилга шаардлагатай "Johnson & Johnson's Janssen"-ий вакцинаас дөрвөн сая тун захиалжээ. БНСУ-ын Эрүүл мэндийн яам "AstraZeneca"-тай аль хэдийн гэрээ байгуулсан бөгөөд энэ сарын сүүл гэхэд бусад гурван компанитай гарын үсэг зуралцана гэнэ.

Мөн уг вакцин худалдан авах ажилд зориулан 1.3 их наяд вон буюу 1.2 тэрбум ам.долларын төсөв батлаад байгаа аж.

Өмнөд Солонгосын нийт хүн амын 88 хувийг вакцинжуулах эдгээр вакцин нь ирэх оны хоёрдугаар сараас эхлэн тус улсад ирэх төлөвтэй байгаа хэдий ч вакцинжуулалтын аян хэзээ эхлэх нь хараахан тодорхой болоогүй байна. "Вакцины боловсруулалт хараахан дуусаагүй байгаа бөгөөд аюулгүй байдал, үр дүнтэй холбоотой асуудал байсаар байгаа тул бид янз бүрийн хүчин зүйлийг харгалзан үзэж, вакцинжуулалтын хуваарийг уян хатнаар шийдвэрлэнэ" гэж Эрүүл мэндийн сайд Пак Нынгхү мэдээлсэн юм.

Бүс нутгийн эрүүл мэндийн байгууллагууд олон нийтийн вакцинжуулалтын үйл явцыг бэлтгэх, бусад улс оронд гарч болзошгүй гаж нөлөөг хянах зорилгоор вакцины хөтөлбөрийг ирэх оны сүүлийн хагаст эхлүүлэх нь зүйтэй гэж үзэж байгаа аж. Вакциныг эхлээд халдварын эмзэг бүлгүүд болох ахмад настан, асрамжийн газрын оршин суугчид болон эрүүл мэндийн ажилтнуудад тарих бол дараагаар нь бусад хүн амыг эрсдэлийн дарааллаар нь хамруулах байна.

Эх сурвалж: Yonhap News Agency