"Хаппи веритас" эмнэлгийг үүсгэн байгуулагч, анагаах ухааны доктор Ж.Амарсанаатай ярилцлаа. Түүний талаар, ялангуяа цахим орчинд "Ухань руу явах хүсэлт гаргаад байсан. Сэлэнгэ рүү явахгүй юм байх даа. Ж.Амарсанааг эрэн сурвалжилж байна" гэхчлэн яриа дэгдээд амжсан. Энэ тухай болон коронавирусийн халдварыг хэрхэн даван туулж болох талаар түүнтэй ярилцлаа. 

Доктор Ж.Амарсанаа: 
-Коронавирус манай улсад тархаж байгаа ч би тайван байна. Иргэдийг ч тайван байхыг уриалж байна. Учир нь энэхүү халдварын нас баралт Ази тивд харьцангуй бага байгаа. Энэ нь хэд хэдэн шалтгаантай. Ази тивд томуугийн дэгдэлт давтамжтай байдаг учир иргэдэд дархлаа суусан байдаг. Мөн, ази хүмүүс хувийн ариун цэвэр, сахилга бат сайтай ард түмэн. Төрийн оролцоо сайн байдаг зэрэг нь Ази тивд нас баралт багатай байлгаж байна. Иймд бид энэ хүнд хэцүү үеийг зовлон багатай туулан гарна гэдэгт итгэлтэй байна. 

Ковидоос илүү миний санааг зовоож байгаа зүйл бол иргэдийн орлогогүй байдал, өлсгөлөн, ядуурал, хүнс тэжээлийн дутмаг байдал. Жижиг дунд үйлдвэрлэлийн салбарынхан орлогогүй болох вий. Гэр хорооллын иргэд өлсөх вий гэж би санаа зовж байна. 

-Таны талаар Ухань хот руу явъя гэсэн хүсэлт гаргаад байсан. Сэлэнгэ рүү хүсэлтээрээ явахгүй юм байх даа гэсэн хошин ч гэмээр яриа гараад байна? 

-Сэлэнгэ рүү явъя гэж би хүсэлтээ гаргаагүй шүү дээ. Харин Дорноговь руу бол явъя гэж хүсэлтээ өгч байсан. ХӨСҮТ дээр ажиллая гэсэн. Гэвч миний хүсэлтийг хүлээж аваагүй. Бүр зарим нь намайг хайгаад байна гэсэн байна лээ. Би хаана ч нуугдаагүй. Би эмнэлэг дээрээ, фейсбүүктээ байж л байна. Иргэдийнхээ дунд байж л байна. 

---