1937 оноос хойш Монголын бурхан шашин, лам хуврагуудын дунд өргөн хэмжээний ном хаялцах үйл ажиллагаа зохиогдож байгаагүй юм. Тэгвэл өнөөдөр 80 жилийн дараа Монголын Бурхан шашинтны төв Гандантэгчэнлин хийдийн “Батцагаан” цогчэн дуганд буддын гүн ухааны номын мэтгэлцээн боллоо.
Энэ удаа Энэтхэгт суралцаж байгаад Ковид19-ийн улмаас эх орондоо ирсэн 16 зиндааны 200 орчим ламхай нар зэрэг ахих шалгалтаа өгчээ. Энэ үеэр Дээрхийн гэгээн XIV Далай лам онлайнаар айлдвар айлдсан. Ном хаялцах нь биеийн болоод сэтгэлийн асар их хүч шаарддаг. Бүжиг мэт уран хөдөлгөөн, магтаал найраг мэт хэлэлцдэгээрээ гайхагддаг үйл юм. Ном хаялцахад таарах нь түмэн засал хийлгэсэнтэй эн тэнцүү гэж өвгөн буурлууд ярьдаг.

---