"Facebook" олон нийтийн сүлжээний компани өөрсдийн платформ дээрх хүмүүсийг вакцинжуулалтын эсрэг уриалсан сурталчилгааг хориглох болсноо өнгөрөгч мягмар гарагт зарлажээ. Коронавирусийн цар тахлын энэ үеэр эрүүл мэндийн урьдчилан сэргийлэх арга хэмжээний ач холбогдол илүү тод болоод байгааг тус компаниас онцолсон юм.

Энэхүү технологийн аварга компанийг вакцины эсрэг хөдөлгөөнийг цэцэглүүлэн зөвшөөрдөг гэж олон хүн эртнээс шүүмжилсээр ирсэн. Үүнээс өмнө "Facebook" компани аль хэдийн Дэлхийн эрүүл мэндийн байгууллага, Халдварт өвчнийг хянах, урьдчилан сэргийлэх төв зэрэг нийгмийн эрүүл мэндийн байгууллагуудаас тогтоосон хуурамч мэдээлэл, луйврын зар, сурталчилгааг хориглоод байсан билээ.

Гэхдээ энэ удаагийн хоригийн хүрээнд вакцинжуулалттай холбоотой Засгийн газрын дүрэм, журмыг дэмжсэн эсвэл эсэргүүцсэн сурталчилгаанд ямар нэгэн хязгаарлалт тавихгүй гэнэ. Харин компанийн зүгээс АНУ-ын оршин суугчдыг улирлын томуугийн вакцинд хамрагдахыг уриалсан олон нийтийн мэдээллийн кампанит ажлыг эхлүүлэхээр төлөвлөж байгаа аж.

АНУ-ын эрүүл мэндийн байгууллагуудын мэдээлснээр тус улсад ямар ч вакцин хийлгэлгүйгээр хоёр нас хүрдэг хүүхдүүдийн тоо 2015 онд төрсөн хүүхдүүдийн дунд 1.3 хувьтай байжээ. Мөн вакцинаас чөлөөлөгдөх өргөдөл гаргасан гэр бүлийн тоо 2017-2018 онд гурав дахь жилдээ дараалан өссөн байна.

Эх сурвалж: The Korea Times

---