LIVE: Д.Нямхүү: Токио-Улаанбаатарын онгоцоор ирсэн дөрвөн иргэн халдвартай болохыг тогтоолоо

ЭМЯ-аас ‘COVID-19’ цар тахлын цаг үеийн нөхцөл байдлын цаг үеийн мэдээллийг  хүргэлээ.
ХӨСҮТ-ийн Ерөнхий захирал Д.Нямхүү: Сүүлийн хоёр хоногт ХӨСҮТ-ийн Вирус судлалын хоёр лаборатори, ЗӨСҮТ-ийн лаборатори, Сэлэнгэ аймгийн Вирус судлалын салбар лабораторид нийт 1352 хүнд шинжилгээ хийхэд 1350 хүнээс "Covid-19" халдвар илрээгүй. Харин аравдугаар сарын 10-нд Токио-Улаанбаатар чиглэлийн тусгай үүргийн онгоцоор ирсэн хоёр хүнээс вирус илэрлээ. Тодруулбал, дээрх иргэд нь 30 настай эрэгтэй, 20 настай эмэгтэй юм байна. Ингээд аравдугаар сарын 10-ны өдрийн Токио-Улаанбаатарын онгоцоор дөрвөн хүн коронавирусийн халдвартай болох нь тогтоогдлоо. 

Өнгөрсөн гурав хоногийн хугацаанд нэг хүн эдгэрч, ХӨСҮТ-ийн эмнэлгээс гарч дараагийн шатны сувилалд шилжсэн. Эдгэрсэн иргэн нь Алтанбулагийн боомтоор орж ирсэн ачаа тээврийн жолооч бөгөөд 53 настай ОХУ-ын иргэн байна. Ингээд Монгол Улсад нийт батлагдсан тохиолдол 320 боллоо. Үүнээс 311 нь эдгэрч, 97 хувьтай байна. Бүх ажиглалт, тандалтаа дуусгасан 297 хүн байгаа бол гэрийн ажиглалтад 4, сувилалд 10 хүн байна.

Өнөөдөр ХӨСҮТ-ийн клиникт 9 хүн хэвтэн эмчлэгдэж байна. Эдгээр хүмүүсийн биеийн байдлыг үнэлбэл долоо нь хөнгөн, хоёр хүний биеийн байдал хүндэвтэр байна.

Өнөөдөр үүрийн 04 цагт ажиглах байранд тусгаарлагдан, хянагдаж байсан эмэгтэй ХӨСҮТ-д ирж төрж 2.8 кг жинтэй хүүтэй боллоо гэсэн юм.