МУИС-ийн номын сан хамгийн үнэ цэнэтэй, ховор сан хөмрөгөө дэлгэн үзүүлж байна

МУИС-ийн номын санд ховор нандин ном бүтээл, монгол бичгээр бүтээгдэж хадгалагдаж үлдсэн хосгүй үнэтэй бичвэрүүд хадгалагдаж байдаг. Эдгээр нь ихэвчлэн Монгол улсын түүх, түүхэн хүмүүсийн тухай бичигдсэн байдаг байна. Эдгээр бүтээлүүдийг хувь хүмүүсээс авч хадгалж үлдсэн байдаг. Мөн цаг үе хэцүү үед үнэт ховор судар бичгүүдийг ард иргэд хадгалуулахаар бичиг номын хүрээлэнд өгдөг байжээ. Эдгээр ховор бүтээлүүд дунд 1900 оны үед бичигдсэн зохиогч нь тодорхойгүй бүтээл багтаж байна.

Тус сан хөмрөгт нэн ховор 399 бүтээл байгаа бөгөөд эдгээрийн 366 нь Монгол бичгээр бичигдсэн ховор бүтээл юм. Мөн судалгааны ажлын чиглэлээр монгол бичгээр бичигдсэн 600 орчим бүтээл бий.

Аливаа улсын үүх түүхийг бичмэл материалаас нь мэдэж болдог. Зөвхөн нэг улс биш хөрш зэргэлдээ улсуудын түүх ч хадгалагдаж үлддэгээрээ онцлогтой. Тиймдээ ч олон улсын судлаачид зориод ирэхэд үзүүлэх сан хөмрөгтэй байх нь чухал гэдгийг онцолж байлаа. Мөн Монголын нууц товчооны 780 жилийн ойд зориулан дэлгэж буй эхүүд, хятад бичвэрүүд, гар бичмэл судалгааны материалууд танилцуулагдаж байна.

Өнөөдрийн үзэсгэлэнгийн өөр нэг зорилго нь иргэдийн гарт хадгалагдаж байгаа ховор нандин бүтээлийг номын сандаа татаж авах, сэргээн засварлах, худалдаж авч урын сангаа баяжуулах юм. Судалгаа материалд нэн чухал ач холбогдолтой түүхэн бичвэрүүдийг хадгалж байгаа иргэдийг МУИС-ийн номын сантай холбогдохыг хүсэж байна.