Зүрхний гажигтай 28 хүүхэд үнэ төлбөргүй хагалгаанд орохоор Хятадыг зорилоо
Монголын Улаан загалмайн нийгэмлэгийн тусламжтайгаар төрөлхийн зүрхний гажигтай 47 хүүхэд энэ онд багтаж БНХАУ-д үнэ төлбөргүй хагалгаанд орохоор болсон. Эдгээр хүүхүүдийн тал нь буюу 28 хүүхэд Хятадын нийслэл Бээжин хотыг зорилоо.
Өнгөрсөн 10 дугаар сард Бээжин хотын Анзен эмнэлэг болон ӨМӨЗО-ы Хүүхдийн эмнэлгийн зүрх судасны тасгийн эмч нар Улаанбаатар хотод ирээд буцсан. Тэд зүрх судасны төрөлхийн гажигтай 1-14 настай хүүхдүүдийг үзэж оношлон 47 хүүхдийг сонгож үнэ төлбөргүй хагалгаа хийж эмчлэхээр болсон юм.
Хятадын Улаан загалмайн нийгэмлэг өнгөрсөн жилээс эхлэн “Бүс ба зам хүмүүнлэгийн тусламжийг Монголын хүүхдүүдэд үзүүлэх нь – Сахиусан тэнгэрүүдийн аялал” хөтөлбөрийг хэрэгжүүлж байна. Уг хөтөлбөрийн хүрээнд Хятадын зүрх судасны эмч мэргэжилтнүүд, эмнэлгүүдтэй хамтран Монголын бяцхан сахиусан тэнгэрүүдэд итгэл төгс ирээдүй, шинэ амьдрал бэлэглэж байгаа юм.
2017 онд 53 хүүхэд Хятадын эмнэлгүүдэд хагалгаанд орж, хагалгаа хийсэн эмч нар нь өнгөрсөн намар Монголд ирж өвчтнүүдээ эргэсэн. Ирэх онд зүрх судасны төрөлхийн эмгэг гажигтай дахин 100 хүүхдэд үнэ төлбөргүй хагалгаа хийхээр төлөвлөжээ.
Эх сурвалж: www.china.org.cn
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.