Гашуунсухайт боомт дээр юу болоод байна вэ

БНХАУ-ын талаас нэг ч боомтоор Монголын нүүрсийг нэвтрүүлэхгүй боллоо, Гашуунсухайт боомт дээр нүүрс ачсан машинууд хэдэн арван км газар үргэлжлэн оочерлож байна гэсэн мэдээллийг хэвлэлүүд өнөөдөр онцолсон.

Нүүрс ачсан машинууд урд хилээр нэвтэрч чадахгүй байгаа шалтгаан нь ердөө Хятадын хил, гаалиас "Ухаалаг гарц" гэх шинэ технологи нэвтрүүлж, мэдээллүүдийг шивж оруулахад цаг хугацаа их зарцуулж байгаатай холбоотой аж.

Программ хангамж шинэчлэгдтэл хугацаа их алдаж байгаа тул ийн урт дараалал үүссэн байна.

Дээрээс нь нүүрсний машинуудад байдаг хил нэвтрэх С зөвшөөрлийн бичгийн хугацаа дууссан тул Монголын талын ажлын хэсэг Хятадын талтай уулзалт хийж тохиролцсоны дагуу хугацаа дууссан зөвшөөрлийн бичгүүдэд сунгалт хийжээ.

Өнөөдрийн байдлаар Гашуунсухайт боомт дээр 91 км урт үргэлжилсэн нүүрсний машинууд зогсож байгаа бөгөөд нэмж дараалал үүсгэхгүйн тулд уурхайн ачилтуудыг түр зогсоон хил, гаалийн байгууллагуудтай хамтарч нүүрс тээвэрлэлт хэвийн болох хүртэл лац олгохгүй байна.

Дараалалд зогсолт хийсэн жолооч нарын аюулгүй байдалд анхаарч, хоол унд, амрах байраар хангах үүргийг тээвэрлэгч аж ахуй нэгжүүдэд өгчээ.

Хятадын хил, гаалиас "Ухаалаг гарц" гэх шинэ технологи нэвтрүүлж, мэдээллүүдийг шивж оруулахад цаг хугацаа их зарцуулж байгаа тул программ хангамж шинэчлэгдтэл нэг машиныг хилээр шалгаж нэвтрүүлэхэд ойролцоогоор 30-40 минут шаардагдах юм байна. Тиймээс цуваанд очерлож буй жолооч нарын гаалийн бүрдүүлэлтийг урьдчилан хураан авч, программдаа давхар шивэх арга хэмжээг Хятадын талаас авч байгаа бөгөөд татан авалт хэвийн болтол өдөрт 200-300 машин хилээр нэвтрэх тооцоо гарчээ.

Өнөөдөр Монголын хилээр 83 тээврийн хэрэгсэл гарсан боловч Хятадын талаас таталт аваагүй тул хилийн дундын бүсэд байрлаж байна.

Урт цуваа, оочер дарааллыг шийдэх үүднээс ачаагүй тээврийн хэрэгслүүдийг Оюутолгойн замаар явуулж, Цагаанхадны гаалийн бүсэд буулгах ачаатай тээврийн хэрэгслүүдийг Гашуунсухайтын нүүрс тээврийн авто замаар 2 эгнээгээр явуулахаар зохион байгуулаад байна. Дашрамд дурдахад, Тавантолгой-Гашуунсухайт чиглэлд нийт 12000 гаруй тээврийн хэрэгсэл нүүрс тээвэрлэлт гүйцэтгэж буй бөгөөд Автотээврийн үндэсний төв ТӨҮГ-аас хил нэвтрэх С төрлийн зөвшөөрлийн бичгийг 6200 тээврийн хэрэгсэлд олгосон байдаг. Үлдсэн 6000 гаруй тээврийн хэрэгсэл нь уурхайгаас хил хүртэл уртын тээвэрлэлт гүйцэтгэж байна.