БНХАУ энэ оныг дуустал бүх боомтоор ямар ч төрлийн нүүрс импортлохгүй байх шийдвэр гаргасан талаар хэвлэлүүд өнөөдөр онцолсон билээ. Энэ мэдээлэлтэй холбоотойгоор Гашуунсухайт боомтын ажлын хэсгээс мэдээлэл авлаа. Ажлын хэсэг Хятадын талтай уулзан таталтыг дөнгөж сая хийж эхэлсэн талаар хэлэв.

Хятадын хил, гаалиас “Ухаалаг гарц” гэх шинэ технологи нэвтрүүлж, мэдээллийг нь шивж оруулахад цаг хугацаа их зарцуулж байгаа юм байна. Тиймээс таталтаа хийж, программ хэвийн болтол нэг машиныг ойролцоогоор 30-40 минутанд хилээр гаргахаар тохиролцжээ. Ингэж тооцвол өдөрт 200-300 машин хилээр нэвтрэх юм байна. Татан авалт хэвийн болтол ийм зохицуулалт хийхээр болсон талаар Авто тээврийн үндэсний төвөөс мэдээллэв.

Өчигдөр Гашуунсухайт боомтоор 32, өнөөдөр ердөө 16 нүүрс ачсан машин хил нэвтэрсэн байна.

---