Хамгийн шилдэг Солонгос зоогууд

Дэлхий дээр хоолны соёлоор Солонгосчууд дээгүүр байр эзэлдэг болжээ. Солонгос хоолны гол хачир кимчи гэхэд л зуу гаруй төрөл бий. Тэгвэл бид өдөр тутамдаа биш ч өөрийн эрхгүй идмээр санагддаг Солонгос үндэсний амтат зоогнуудыг онцоллоо. Хэдийгээр соёлын хувьсгал хийсэн ч эдгээр зоог үндэстнийг тодорхойлох бахархал хэвээр үлдэж чаджээ.

1.    Кимчи

Солонгос хоолыг кимчигүйгээр төсөөлөх аргагүй. 2,000 жилийн тэртээх Шилла гүрнээс улбаатай халуун ногоонд дарсан байцаа Солонгос айл бүрийн ширээнд зайлшгүй байх зоог юм. Чинжүү, сармис, цагаан гаа, ногоон сонгиноор байцааг амталж дарна. Амтлах мэдрэмжийн тухайд манай уншигчид хэлүүлэлтгүй мэдэж байгаа гэдэгт найдаж байна.

2.    Дүфүтэй шөл

Зөөлөн дүфү бол Солонгос хоолны сэргэг зөөлөн амтыг мэдрүүлсэн түгээмэл зоог. Аяганд чанасан дүфүний шөлөн дээр өндөг хийгээд таны хоол бэлэн болно.

3.    Самгёбсал

Энэ хоолны хамгийн сайхан нь зоог барьж буй хүмүүсийн уур амьсгал байдаг аж. Байцаанд ороосон гриллдэж шарсан гахайн мах идэх зуураа хундага сөжү /Солонгос үндэсний архи/ уух нь яах аргагүй Солонгос хэв маяг.

4.    Жажангмён /жантай гоймон/

Уг зоогийг Хятадаас гаралтай гэж үздэг. Солонгос хүн бүр долоо хоногт дор хаяж нэг удаа жажангмён иддэг байна.

5.    Чанасан гоймон

Усанд чанасан халуун ногоотой гоймонг туна загас, өндөг, бяслаг зэргээр баяжуулан Солонгосчууд идэх дуртай.

6.    Кимчитэй шөл

Солонгос иргэд кимчиг төрөл бүрийн хуурга, шөлөнд ашигладаг. Эдгээрийн нэг кимчитэй шөлөнд гахайн мах, хүнсний ногоо, дүфү улаан байцаа зэрэг ордог. Халуун ногоотой амтлаг шөлөнд би ч бас дуртай.

7.    Самгётан

Солонгосчууд “халууныг халуунаар л дардаг” гэж ярих дуртай аж. Тиймээс аагим халуун зунаар ч буцламгай халуун шөл уудаг. Халуун тогоо дүүрэн бүтэн тахианы шөлийг ядаргаа тайлах увидастай гэлцдэг байна.

8.    Бибимбап

Яг л салад шиг харагдах аягатай хоолонд агшаасан будаа, холимог ногоо,  үхрийн мах, өндөг гол орцонд нь багтдаг.

9.    Гамжатан

Гамжатаны газрууд бараг 24 цаг ажилладаг. Учир нь Өмнөд Солонгосчууд өглөө эрт, ялангуяа согтууруулах ундаа хэрэглэсний маргааш энэ шөлийг ихэвчлэн уудаг. Гахайн ясны халуун ногоотой шөлөнд төмс, гүнжидийн үр голчлон орно.

10. Сүндэ

Сүндэ бол Солонгос үндэстний гудамжны зоогийн нэг төрөл. Зайдсархуу маягийн уг хоол манай Монголчуудын хонины цустай нарийн гэдэстэй төстэй. Гэхдээ гоймон, ногоо, мах, гахайн дотор гэдсээр баяжуулсан байдаг аж.

Эх сурвалж: www.cnn.com