Нүүрс тээврийн машин нь шатаж 95 хувьтай түлэгдсэн жолоочид хандив хүслээ

Гашуун сухайт боомтын чиглэлд 166 ААН, байгууллага нүүрс тээвэрлэлтийн үйл ажиллагаа явуулдаг. Үүний нэг нь “Омог цагаан шонхор” ХХК бөгөөд энэ сарын 9-ны өдөр тус компанид жолоочоор ажилладаг Д.Дашдоржийн жолоодож явсан машины бүхээгт гал гарсны улмаас биеийнх нь 95 хувь түлэгдсэн байдалтай Гэмтлийн эмнэлэгт ухаангүй хэвтэж байна. 

Д нь ажил үүргээ гүйцэтгэх явцдаа осолд орж биеийнх нь 95 хувь түлэгдсэн. Гэтэл “Омог цагаан шонхор” хэмээх ХХК нь ажилтныхаа эмчилгээний зардлыг олгохгүй байна

Ослын шалтгааныг нүүрс тээвэрлэдэг машинуудад хэрэглэж буй зориулалтын бус агааржуулалт, халаагуурын сэнстэй холбоотой хэмээн үзэж байгаа аж. Энэ талаар Монголын Эрчим хүч, геологи, уул уурхайн үйлдвэрчний эвлэлийн холбоо, Тээвэр холбоо, газрын тосны үйлдвэрчний эвлэлийн холбоо болон иргэн Д.Дашдоржийн ар гэрийнхэн мэдээлэл хийлээ.

Монголын Эрчим хүч, геологи, уул уурхайн үйлдвэрчний эвлэлийн холбооны дарга Х.Буянжаргал “Д нь ажил үүргээ гүйцэтгэх явцдаа осолд орж биеийнх нь 95 хувь түлэгдсэн. Гэтэл “Омог цагаан шонхор” хэмээх ХХК нь ажилтныхаа эмчилгээний зардлыг олгохгүй байна. Үйлдвэрлэлийн осолд орсон ажилтны эмчилгээний зардлыг байгууллага нь хариуцах хуультай. Гэвч Монгол Улсад бүртгэлтэй, хятад эзэнтэй тус компанид хууль үйлчлэхгүй байна. Тиймээс бид Д-ийн эмчилгээний зардлыг олготол үйл ажиллагааг нь түр зогсоохыг Монгол Улсын Ерөнхий сайд болон Уул уурхайн сайдаас хүссэн” гэлээ.

Д.Дашдоржийн эхнэр Туул “Манайх ам бүл тавуулаа. 1-8 насны гурван хүүхэдтэй. Нөхөр маань гэр бүлээ тэжээдэг ганц хүн. Осол шөнийн 02:00 цаг орчимд гарсан. Одоогоор даралт хэлбэлзэлтэй, зүрх судасны үйл ажиллагаа хүнд, шокийн байдалтай байна. Осол гарснаас хойш “Омог цагаан шонхор” ХХК-тай уулзахаар хоёр удаа уулзалт товлосон. Эхний удаад 16 цагт уулзъя гэчихээд шөнийн 23 цаг өнгөрч байхад ирсэн. Дараагийн удаад эмчтэй нь уулзъя гэсэн. Тэгэхээр нь 11 цагт эмчийг нь хүлээлгэсэн байхад 16 цагт ирсэн. Иймэрхүү байдалтай бид нартай харьцаж байгаа.

Мөн Хятадын талаас эмчилгээний мөнгийг гаргахгүй гэсэн байр суурьтай байна гэдгийг уламжилсан. Үнэхээр гомдолтой байна. Хамгийн чухал эмчилгээ нь донор арьс нөхөх эмчилгээ. Гэтэл Монголд байгаа нөөц нь маш хангалтгүй байгаа тул гаднаас захиалж авчрах шаардлагатай байгаа” гэв.

Эмчилгээний зардал нэг өдөрт багадаа хоёр сая төгрөг шаардагдаж байгаа юм байна. Тиймээс ар гэрийнхэн нь нийт ард иргэдээс хандив хүссэн юм.

 Хандивын данс 5721594599 Туул /эхнэр/