"Рио Тинто" групп Гүйцэтгэх захирал Жан Себастьян Жакыг огцруулсныхаа дараа шинэ удирдагчаа хайж байна.

Өнгөрсөн тавдугаар сард "Рио Тинто" компани Жан Себастьян Жакын удирдлага дор Австралийн Пилбара мужид төмрийн хүдэр олборлох зорилгоор тэсэлгээ хийж байхдаа бүс нутгийн уугуул иргэд аборигенуудын 46 мянган жилийн түүхтэй соёлын үнэт өв болох чулуун агуйнуудыг сүйтгэсэн билээ. Үүний дараа компани удирдах албан тушаалтнуудад санхүүгийн шийтгэл ногдуулахаар төлөвлөөд байсан.

Гэвч "Рио Тинто"-гийн хөрөнгө оруулагчид болон уугуул иргэдийн бүлэг уг хэргийн талаар илүү хүчтэй арга хэмжээ авч, хариуцлага тооцохыг шаардсаны улмаас тус компани Жан Себастьян Жак болон бусад хоёр удирдах албан тушаалтныг огцруулсан юм. 

Дэлхийн хоёр дахь том уул уурхайн компани болох "Рио Тинто" одоо шинэ Гүйцэтгэх захирлаа сонгохоор дотоод болон гадаад хувилбаруудаа судалж байгаа бөгөөд компанийн сэвтсэн нэр хүндийг засах ур чадвар бүхий нэр дэвшигчдийг онцгойлон хайж байгаа гэж тус компанийн тэргүүн Саймон Томпсон хэлжээ.

Тэрээр "Шинэ Гүйцэтгэх захирал бидний олон нийт болон тэдний өв соёлыг зөв зохистой, үр дүнтэй зохион байгуулах чадварт итгэх итгэлийг сэргээх явдлыг хариуцах ёстой болно. Энэхүү үйл явц хэдэн сар эсвэл хэдэн жил ч үргэлжилж магадгүй. Энэ бидний гол шалгууруудын нэг байх болно" гэсэн аж. 

Тэгвэл хэд хэдэн хөрөнгө оруулагч, шинжээчдийн нэрлэж буй зарим нэр дэвшигчдийн дунд "Рио Тинто" компанийн Эрчим хүч, эрдсийн группийн захирал Баатарын Болд багтсан байна.

"Bloomberg" агентлаг түүний талаар ийнхүү нийтэлжээ:

Б.Болд нь Гүйцэтгэх захирлын албан тушаалд компани дотроос сонгогдох хамгийн өндөр магадлалтай нэр дэвшигчдийн нэг. Монголын иргэн тэрээр өмнө нь хөрөнгө оруулалтын банкир байсан бөгөөд 2016 онд "Рио Тинто"-д ажиллаж эхлэхээсээ өмнө "JPMorgan Chase & Co." хөрөнгө оруулалтын банканд захирлын алба хашиж байжээ. Тэрээр одоо "Рио Тинто" компанийн Эрчим хүч, эрдсийн бизнесийг ахалдаг бөгөөд мөн гэрээ байгуулдаг нэгжийг удирддаг. Б.Болд бол стратегийн сэтгэгч бөгөөд түүний үүрэг хариуцлагад компанийн ирээдүйд ямар түүхий эд нэн чухал болохыг тодорхойлох зэрэг багтдаг.

Уг нийтлэлд онцолсон бусад нэр дэвшигч нар нь:

Дэлхийн хамгийн том алт олборлогч "Newmont Corp." компанийн Гүйцэтгэх захирал Том Палмер

"Рио Тинто"-гийн томоохон өрсөлдөгч болох "BHP" компанийн санхүүгийн асуудал хариуцсан дарга Питер Бивен

Австралийн хамгийн том алт олборлогч компани "Newcrest Mining Ltd."-ийн Гүйцэтгэх захирал Сандип Бисвас

"South32" компанийн Гүйцэтгэх захирал Грэм Керр

Эх сурвалж: Bloomberg

---