Дэлхийн анхны коронавирусийн эсрэг вакциныг "Спутник V" гэж нэрлэжээ

ОХУ дэлхийн анхны коронавирусийн эсрэг вакциныг амжилттай гарган авч, өнгөрөгч мягмар гарагт албан ёсоор бүртгүүлсэн болохыг Ерөнхийлөгч Владимир Путин зарлажээ. Түүнчлэн тэрээр түүний охидын нэг нь энэхүү вакциныг аль хэдийн тариулсан болохыг мэдэгдсэн юм.

Ерөнхийлөгч Путин өчигдөр хийсэн мэдэгдэлдээ "Өнөө өглөө, дэлхийн хэмжээнд анхны шинэ коронавирусийн эсрэг вакцин бүртгэгдлээ. Энэхүү вакцин үр дүнтэй бөгөөд тогтвортой дархлааг тогтоодог гэдгийг би мэднэ" гэсэн байна. Мөн түүний охинд илэрсэн ганцхан харш нөлөө нь нэг өдрийн турш 38 градус халуурсан явдал л байсан гэнэ. 

Олон мянган сайн дурын оролцогчийг хамруулсан уг вакциныг боловсруулсан Төрийн өмчит Гамалеийн судалгааны хүрээлэнгээс өнгөрсөн долоо хоногт туршилтын гуравдугаар үе шатыг эхлүүлсэн аж. Оросын Эрүүл мэндийн яамнаас вакциныг бөөнөөр үйлдвэрлэх ажлыг ирэх сараас эхлүүлэхээр төлөвлөөд байгаа бөгөөд вакцинжуулалтын ажлыг ирэх аравдугаар сараас эхлүүлэх төлөвтэй байгаа гэнэ. Харин ирэх жил буюу 2021 оны нэгдүгээр сарын 1-нээс вакцин олон нийтийн дунд чөлөөтэй эргэлтэд орох ажээ.

Дэлхийн анхдагч хэмээн цоллосон тус вакциныг Зөвлөлт Холбоот Улсын 1957 онд хөөргөж байсан дэлхийн анхны сансрын хиймэл дагуул болох "Спутник V"-ын нэрээр нэрлэсэн байна. Гэвч барууны эрдэмтэд болон Дэлхийн эрүүл мэндийн байгууллагын зүгээс энэхүү вакцины аюулгүй байдалд санаа зовниж буйгаа илэрхийлээд байгаа юм.

Эх сурвалж:The Moscow Times