Нийслэлээс гурван аймаг руу зорчих тээврийн хэрэгслийн хөдөлгөөнийг түр хаалаа

Улаанбаатар хотоос Говьсүмбэр, Дундговь, Хэнтий чиглэлд зорчих тээврийн хэрэгслийн хөдөлгөөнийг зургаадугаар сарын 22-ны 00:00 цагаас 15:00 цаг хүртэл хугацаанд түр хаалаа.

Аадар борооны улмаас эвдэрч, гэмтэл учирсан авто зам, замын байгууламжид засвар, цэвэрлэгээ хийгдэнэ гэж Тээврийн цагдаагийн албанаас мэдээлэв.

Мөн улаанбаатар хотоос Дорноговь аймаг чиглэлийн галт тэрэгний хөдөлгөөнийг түр хугацаанд зогсоосон байна.

Зургадугаар сарын 21-ний орой Төв аймаг, Говьсүмбэр аймгийн зааг Баян, Баянтал сумын хооронд 17:15-18:00 цагийн хугацаанд орсон аадар борооны улмаас үер бууж Агуйт, Наран-Элгэн зөрлөг орчим 572-592 дугаар км-д төмөр зам үерийн усанд угаагдаж галт тэрэг явах боломжгүй болжээ.

Тиймээс тодорхойгүй хугацаагаар энэ чиглэлийн галт тэрэгний хөдөлгөөн хаагдаад байна. Засварын бригадууд үзлэг шалгалт хийн сэргээн засах ажил эхэлсэн аж.

Дээрх чиглэлүүдэд зорчиж байсан 82 зорчигчдыг суурин газарт аюулгүй, тав тухтай байршуулах ажлыг Автотээврийн үндэсний төв ТӨҮГ даатгалын байгууллагууд болон тээвэр зохицуулагч нартай хамтран зохион байгуулж байна.
Мөн Чойр, Говьсүмбэр, Дорноговь, Замын-Үүд чиглэлд төмөр замын гарам эвдэрч галт тэрэгний хөдөлгөөн саатсан тул тус үйлдвэрийн газраас автобус гарган зорчигчдыг саадгүй тээвэрлэх ажлыг Зам, тээврийн хөгжлийн яам болон УБТЗ-тай хамтран зохион байгуулж байна.