Hello Kitty-ийн 92 настай гүйцэтгэх захирал чөлөөндөө гарна

Японы алдарт Hello Kitty брэндийн үүсгэн байгуулагч, гүйцэтгэх захирал Шинтаро Цужи чөлөөндөө гарч буйгаа зарлажээ. Тэрээр өдгөө 92 насыг зооглож байгаа юм.

Шинтаро Цужи захирал өөрийн Санрио компани дахь эрх мэдлээ 31 настай ач хүү Томокуни Цужид шилжүүлэн өгөхөөр болжээ. Энэ нь тус компанийн 60 гаруй жилийн түүхэнд удирдах түвшинд гарсан анхны өөрчлөлт, халаа сэлгээ болж буйгаараа онцлог юм.

Амгүй, үсгүй хэрнээ толгойдоо эрвээхэй чимэглэл зүүсэн Hello Kitty брэндийн нүүр царай 50 орчим жилийн өмнөөс эзэддээ тэрбум тэрбумын ашиг орлогыг олж ирсээр, одоо ч алдартай хэвээр байгаа билээ. Уг брэндийн хувцас, тоглоом, хичээлийн хэрэглэл охид, хүүхдүүдийн төдийгүй насанд хүрэгчдийн дунд ч хэдийнээ танил болж дэлхийн 130 гаруй оронд борлуулагдаж байна.

Ноён Цужи ирэх долдугаар сарын 1-ний өдөр албан ёсоор гүйцэтгэх захирлын албан тушаалаа орхиж байна. Зөвхөн бэлэг дурсгалын чиглэлээр 1960-аад оны үед компаниа үүсгэн байгуулсныхаа дараа тэрбээр өхөөрдөм өнгө төрх, хэлбэр дүрсийг ашиглан бүтээгдэхүүн үйлдвэрлэж борлуулах санаагаа олжээ. Гэвч өнгөрсөн хугацаанд үргэлж шулуун дардан замаар явсангүй. Японыг тодорхойлох алдарт брэндийн борлуулалт хэдэн жилийн турш буурснаар дэлхий дахинд гаргаж бизнесээ эргэн цэцэглүүлж чадсан билээ.

Нэр хүндтэй эрхмийн төрсөн хүү одоогоос долоон жилийн өмнө зүрх нь хаагдаж таалал төгссөн тул ач хүүдээ компаниа өвлүүлэхээр шийдсэн байна. Өвөөгөөсөө компанийг өвлөн авч буй Томокуни Цужи одоогоор Санрио компанийн менежментийн багийг ахалж байгаа бөгөөд хамгийн залуу гүйцэтгэх захирал болох юм.

Эх сурвалж: ВВС