Вьетнам улсын нийслэл Ханой хотод сүндэрлэх “Hanoi Golden Lake” зочид буудал дэлхийн хамгийн анхны алтаар бүрсэн зочид буудал боллоо. Гадна доторгүй 24 каратын алтаар бүрсэн уг таван одтой зочид буудал нь 2009 онд анх баригдаж эхэлж байжээ.

Дэлхийн олон зочид буудлууд алт оролцуулсан загвартай байдаг ч зөвхөн энэхүү зочид буудал жинхэнэ алтан хавтангаар бүрсэн фасадтай юм. Энэхүү 25 давхар барилга 5 мянган квадрат метр алтадмал керамикаар хучигджээ.

Уг зочид буудал 400 өрөө, алтан дээврийн усан сан, алтаар бүрсэн хоолны хэрэгсэл болон тавилгатай. “Hanoi Golden Lake”-ийн хөгжүүлэгч “Hoa Binh Group”-ийн ерөнхий захирал Nguyen Huu Duong энэхүү төслийг “Анхнаасаа асар үнэтэй бөгөөд эрсдэлтэй төсөл байсан. Аялал жуулчлал орон нутгийн эдийн засгийн манлайлагч болж байгаа энэ үед тус салбар зочдыг татах онцгой бүтээгдэхүүнтэй байх ёстой. Энэ утгаараа “Hanoi Golden Lake” үзэхгүй өнгөрч боломгүй газар байх болно” гэжээ.

Энэхүү зочид буудалд нэг хонох үнэ нь 250 ам.доллароос эхэлдэг ба энэ нь хотын бусад таван одтой зочид буудлуудын санал болгодог үнэтэй ойролцоо. Түүнчлэн зочид буудлын зарим өрөөг орон сууцын зориулалтаар түрээслэх гэнэ. Эдгээрийн ханш нэг квадрат метрийн 6,500 ам.доллароос эхэлдэг байна.

Эх сурвалж: Vietnam Insider, Yahoo Lifestyle

---