Германы “Lufthansa” компани энэ сард БНСУ руу нислэг хийж эхэлнэ
ХБНГУ-ын “Lufthansa” олон улсын агаарын тээврийн компани энэ сараас эхлэн БНСУ руу нислэг үйлдэхээр болсноо өнгөрөгч мягмар гарагт зарлажээ.
Уг компани энэ сарын 24-ний өдрөөс эхлэн долоо хоног бүр Инчён-Мюнхен чиглэлийн гурван удаагийн нислэгийг төлөвлөөд байна. Европын орнууд зургадугаар сарын 15-наас эхлэн гадаадаас ирж буй зорчигчдын нэвтрэх хязгаарлалтыг бууруулахаар төлөвлөж байгаа учир энэхүү шийдвэр гарчээ.
“Lufthansa Солонгосын аялагчдын эрэлт хэрэгцээг хангахын тулд агаарын сүлжээгээ бэхжүүлэхийн зэрэгцээ аюулгүй байдлыг хангах болно” хэмээн тус компанийн Өмнөд Солонгос дахь ерөнхий менежер Алехандро Ариас мэдэгдэв.
Харин Франкфурт чиглэлийн нислэгүүд зах зээлийн нөхцөл байдлаас хамаарах аж. Цар тахлын улмаас агаарын аяллын эрэлт огцом буурсантай холбогдуулан Lufthansa агаарын тээвэрлэгч Инчёноос Мюнхен, Франкфурт хүрэх бүх нислэгээ гуравдугаар сарын дундуур түр зогсоосон билээ. Европын тээвэрлэгчид дундаас зөвхөн “KLM Royal Dutch Airlines” Өмнөд Солонгос ба Нидерландын хооронд нислэгийг үргэлжлүүлэн явуулж байсан юм.
“Air France” болон Финландын төрийн өмчит “Finnair” ирэх долдугаар сард Өмнөд Солонгос руу нислэгээ эргэн үйлдэхээр төлөвлөж байгаа гэнэ. Харин “British Airways”, “Turkish Airlines”, “Polish Airlines” зэрэг Европын бусад агаарын тээврийн компаниуд Өмнөд Солонгос руу хэзээ эргэн нисэж эхлэхээ хараахан зарлаагүй байна.
Эх сурвалж: Yonhap News Agency
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.