Энэтхэгт хорио тавигдсан даруйд архины мухлагууд хөлд дарагджээ

Энэтхэг улсад коронавирусийн улмаас хорио цээрийн дэглэм тогтоосон байсан ч энэ долоо хоногт зарим хотуудад хатуу чанга хориог сулруулж эхлээд байна. Хорио суларсан даруйд архины мухлагууд иргэдийн хөлд дарагдаж, лангуу нь хоосорч эхэлжээ.

Мумбай зэрэг халдварын тархалт өндөр хотуудад согтууруулах ундаагаар цангасан иргэд зай барих, ариун цэврийн дүрэм журам сахихгүй архины мухлагийн гадаа олноороо цуглаж байгаа тул тэдгээр дэлгүүрийг хаажээ.

Цахим орчинд тарснаар Бангалор хотод нэг иргэн дээд тал нь 52,000 рупи буюу 690 ам.долларын согтууруулах ундаа худалдаж авсан байна. Энэтхэгт согтууруулах ундааны хэрэглээ эрс нэмэгдсэнийг гайхах хэрэггүй ажээ.

Хорио цээр тогтоосон улс орнуудад согтууруулах ундааны хэрэглээ, худалдан авалт өссөн судалгаа гарсан байна. Тухайлбал Их Британид өнгөрсөн гуравдугаар сард согтууруулах ундааны борлуулт 22 хувиар, АНУ-д өнгөрсөн жилийнхээс 55 хувиар өсчээ.

Энэ нь Энэтхэгийн хувьд хэзээнээсээ шийдэж чадаагүй асуудал байсаар иржээ. Улсын 29 муж тус бүртээ согтууруулах төрлийн бүтээгдэхүүн, түүний үнэ, худалдаа, татварыг өөрсдийн дүрэм журмаар зохицуулдаг байна. Илүү өргөн хүрээтэй авч үзвэл алкохолын хэрэглээгээрээ Хятадын дараа дэлхийд хоёрдугаарт ордог гэж Лондон дахь судалгааны фирмүүд мэдээлжээ. Энэтхэгчүүд жилд 663 сая литр согтууруулах ундаа хэрэглэдэг байна.

Тэр дундаа вискиний хэрэглээгээр дэлхийд тэргүүлдэг ажээ. Вискиний хэрэглээгээр дэлхийд хоёрдугаарт ордог АНУ-аас гурав дахин их хэрэглэдэг байна. Дэлхий дээр зарагдаж буй вискиний тэн хагас нь Энэтхэгт борлуулагдаж байна гэсэн үг юм.

Эх сурвалж: ВВС