БНСУ-ын нийслэл дэх Итэвоны шөнийн клуб, бааруудтай холбоотой коронавирусийн халдварын тоо улсын хэмжээнд нийт 75-д хүрсэнийг Сөүл хотын дарга Пак Вон Сүн өнөөдөр мэдэгдлээ.

Хэд хоногийн турш орон нутгийн халдваргүй байсан Өмнөд Солонгост энэхүү гэнэтийн дэгдэлт Сөүл хот төдийгүй улс орон даяар түгээд байна. Эрүүл мэндийн байгууллагын удирдлагуудын үзэж буйгаар уг дэгдэлтийн анхдагч халдвар тараагч нь тавдугаар сарын 1-ний шөнөөс өглөө хүртэл Итэвоны таван шөнийн клуб, бааранд зочилсон 29 настай өвчтөн юм.

Хотын захиргаа холбогдох барилга байгууламжид зочилсон 5,517 хүний нэрсийг цуглуулан, одоогийн байдлаар 2,405 хүнтэй нь холбоо тогтоогоод байгаа аж. Холбоо барьсан хүмүүсийн дунд 28 гадаадын иргэн байжээ.

Холбоо барих боломжгүй байгаа хүмүүс хуурамч мэдээлэл өгсөн, эсвэл холбоо тогтоохоос зайлсхийж байна гэж албаныхан үзэж байна. Хотын дарга тэднийг шинжилгээнд хамрагдахыг уриаллаа.

Өнгөрсөн бямба гарагт хотын захиргаанаас нэмэлт дэгдэлтээс урьдчилан сэргийлэх зорилгоор бүх шөнийн цагаар ажилладаг аж ахуйн нэгжийн үйл ажиллагааг зогсоох захирамж гаргасан юм.

Эх сурвалж: The Korea Times

---