Япон улс иргэн бүртээ 100,000 иен тараана

Япон улс шинэ коронавирусийн тахлын улмаас үүсээд буй хямралыг бууруулах арга хэмжээний хүрээнд иргэн бүртээ орлогын түвшин үл харгалзан 100,000 иен /1000 орчим ам.доллар/-ий нэг удаагийн бэлэн мөнгөний тусламжийг үзүүлэхээр болсныг Ерөнхий сайд Шинзо Абэ өчигдөр мэдэгджээ.

Япон улсын засгийн газраас эхэндээ тахлын улмаас орлого нь эрс буурсан өрхүүдэд 300,000 иен олгохоор төлөвлөөд байсан ч, одоо иргэн бүртээ 100,000 иен тараахаар шийджээ. Үүнд нийт 12 их наяд гаруй иен зарцуулна.

Уг шийдвэрийг зарласан өдөр Абэ мөн бүх 47 засаг захиргааны нэгждээ онц байдал зарлав. Тэрээр "Онц байдал зарласнаар иргэдийн гадуур гарах болон бусад үйлдлийг хязгаарлах тул хямралд өртсөн бүх хүмүүст тус бүр 100,000 иен олгох ажлыг эрх баригч намууд анхааралдаа авахыг хүсэж байна" гэжээ.

Япон улсад коронавирусийн халдварын тохиолдол тасралтгүй нэмэгдэж байгаа бөгөөд өнөөдрийн байдлаар нийт 9,231 тохиолдол бүртгэгдэж, 190 хүн нас баржээ.

Эх сурвалж: The Mainichi