Их Британид амьдардаг монгол ах, дүү коронавирус устгадаг тоглоом бүтээжээ

Их Британийн Лондон хотод амьдардаг ах, дүү Л.Сансар, Л.Өлзийт нар коронавирусийг илрүүлж устгах даалгавар гүйцэтгэдэг ухаалаг утасны AR тоглоомыг бүтээжээ.

Тэд London Borough of Merton сургуульд суралцдаг хэдий ч коронавирусийн халдварын улмаас Английн сургуулиуд бүгд түр хаагджээ. Хөл хорионд орж, гэртээ байх болсон ах, дүү хоёр ижил нөхцөл байдалд байгаа хүмүүст зориулан зугаатай тоглоом бүтээхийг хүссэн аж.

Тэд “Коронавирус олон хүний амьдралыг сүйрүүлсэн. Бидний нүдэнд харагддаггүй учир улам аюултай. Тиймээс бид энэ коронавирусийг устгах боломжтой AR тоглоом бүтээхээр шийдсэн” гэв. AR буюу Augmented Reality тоглоом нь компьютерын тусламжтай бүтээгдсэн аливаа графикийг бодит байдалтай хослуулсан хагас бодит орчин дахь тоглоом юм.

11 настай Сансар кодоо бичиж, алгоритмын ерөнхий дизайныг хариуцдаг бол 9 настай дүү Өлзий нь график дизайн дээр ажилладаг аж.

Уг тоглоомыг зүгээр суугаад тоглодоггүй. Өөрийн орчиндоо хөдлөн, гар утасны дэлгэцээрээ вирусийн байршлыг илрүүлж, тэднийг буудан устгаж, мөн тэднээс ирэх дайралтаас бултдаг хөдөлгөөнт тоглоом ажээ. Ах, дүү хоёр мөн тоглоомдоо гараа угаах сануулгыг тусгайлан суулгажээ.

“2020 AR War” уг тоглоомыг та iOS утас дээрээ App Store-оос үнэгүй татан аван тоглох боломжтой юм.

Тоглоомыг татах линк: (https://apps.apple.com/us/app/2020-ar-war/id1506792919?ls=1)