"Лантуун дохио" ТББ-ын тэргүүн Ч.Ганжавхлан: Шалгуулахад бэлэн

Цагдаагийн байгууллагаас “Зөв амьдрах ухаан” ТББ-ын тэргүүн Г.Загдаагийн үйлдсэн гэмт хэрэг, зөрчлийн шинжтэй таван үйлдлийг шалгахаар түүнийг дайчлан баривчилж, цагдан хориод байгаа билээ.

Уг хэрэгтэй холбогдуулан "Босоо хөх Монгол"-оос хүчирхийлэлд өртсөн хүүхдүүдийг хамгаалдаг ТББ-уудыг ч гэсэн шалгах хэрэгтэй гэж мэдэгдсэн дотор "Лантуун дохио" ТББ-ын нэр ч багтжээ. 

Хүчирхийлэлд өртсөн хүүхдүүдийг хамгаалдаг “Лантуун дохио” ТББ-ыг зохион байгуулалтайгаар дайран, гүтгэх, хардах үйлдлийг зохион байгуулж байгаа тул Ч.Ганжавхлан өөрийн фэйсбүүк хуудсаараа дамжуулан шалгуулахад бэлэн байгаагаа мэдэгдсэн байна. 

Тэрбээр “Манай ТББ-н бүх данс тооцоо нээлттэй ил тод буюу шилэн данс хөтөлж явуулдаг. Та бүхэн www.lantuu.mn сайт руу ороод хандив гэдэг цэсийг дарвал өдөр, сар, цаг, минуттайгаа хэн хэдэн төгрөг хандивлаж байгааг бас "Зарцуулалт" гэдэг хананд тэр мөнгө хэрхэн зарцуулагдаж байгааг шилэн байдлаар харж болно. Баянхошуу, Улиастай гэдэг автобусанд суугаад нүдээрээ үзэж харж шалгаж болно. Мэдээж үүнийг би ингэж хэлэх нь хангалтгүй болохоор байнга санхүүгийн аудит ордог. Хамгийн том нь олон улсын их дөрвөлийн нэг E&Y аудит юм. 

Нэг төвийн бүтэн жилийн нийт урсгал зардал ойролцоогоор 360 сая орчим төгрөг байдаг. Харьцуулаад тооцож үзэж болно" хэмээн бичжээ. 

Асрамжийн газар, ТББ-уудад хүчирхийлэл үйлдэгдэж буй эсэхэд хяналт тавих эрхтэй Хүний эрхийн үндэсний комисс, НГБХЗХГ-аас өнөөдрийн байдлаар ямар нэгэн хяналт шалгалт хийж эхлээгүй гэдгийг дурдав.