Таваас есдүгээр сарын цаг агаарын урьдчилсан төлвийг хүргэе. Агаарын температур тавдугаар сард төв, зүүн говийн аймгуудын нутгаар, зургадугаар сард баруун аймгуудын өмнөд хэсгээр, долдугаар сард нутгийн зүүн хагасаар дулаарна. Наймдугаар сард төвийн аймгуудын өмнөд хэсгээр, есдүгээр сард баруун аймгуудын нутаг, говийн нутгийн баруун хэсгээр олон жилийн дунджаас 1.5-2 хэмээр дулаан, бусад нутгаар олон жилийн дунджийн орчим байх төлөвтэй гэнэ.

Хур тунадас долдугаар сард говь болон зүүн аймгуудын нутгаар, наймдугаар сард баруун болон төвийн аймгуудын нутгаар олон жилийн дунджаас ахиу, тав болон зургадугаар саруудад баруун, төв болон говийн аймгуудын нутгаар олон жилийн дунджаас бага хур тунадас орно. Сүүлийн жилүүдэд цаг агаарын гамшигт үзэгдлийн давтамж нэмэгдэж байгаа тул зуны хугацаанд зурвас газраар үе үе ширүүн аадар бороо, мөндөр орж үер буух магадлалтай. Мөн салхины түр зуур хүчтэй ширүүсэх магадлал өндөр байгаа аж.

Түүнчлэн хаврын сүүлч, зуны эхээр гэнэт цочир хүйтрэх, зуны дунд үеэр хэд хоногоор хүчтэй халж, үр тариа, бэлчээрийн болон таримал ургамлын ургалтад муугаар нөлөөлөх эрсдэлтэй гэдгийг Ус, цаг уур, орчны судалгаа, мэдээллийн хүрээлэнгээс анхаарууллаа. Намрын сүүлчээр нойтон цас орж, тариа, хүнсний ногоо цасанд дарагдах зэрэг байгаль цаг агаарын тааламжгүй нөхцөл ажиглагдаж болзошгүйг мөн анхаарууллаа.

А.Дөлгөөн

---