Мария Захарова: Одоо л та нар энэ эх орны иргэн нь гэдгээ санаа юу!

ОХУ-ын Гадаад хэргийн яамны хэвлэлийн төлөөлөгч Мария Захарова өнгөрсөн сард өөрийн фейсбүүк хуудсандаа гадаадад дүрвэсэн оросын баячуудыг шүүмжилсэн нэгэн постыг оруулжээ. Түүний хэлснээр коронавирусийн халдвар гарч, хил хааснаас хойш түүнд дэлхий өнцөг булан бүрээс асар их хэмжээний дуудлага, имэйл, хүсэлтүүд ирэх болсон байна.

Үүнээс нэгэн дуудлагыг тэрээр онцолжээ. Нэлээд чинээлэг гэр бүл Лондон хотод удаан хугацаагаар амьдарч буй хүүгээ эх орондоо буцаан авахаар хувийн онгоц нисгэхийг хүсчээ. “Миний хүү Англид эрүүл мэндийн даатгалгүй болсон, шинжилгээний үнэ 450 фунт стерлинг болоод байна. Орос эх орон руугаа авчирмаар байна” гэсэн аж.

Үүний хариуд Мария Захарова “Баячууд та нар Зөвлөлт холбоот улс нуран унахад эх орон, ард түмэндээ туслахын оронд зөвхөн өөрсдийн эрх ашгийн төлөө харийнханд алт төлөн амьдралаа дээшлүүлэхээр явсан. Та нарын хөрөнгө оруулалт хийж, үл хөдлөх хөрөнгө худалдаж аван, бизнес эхлүүлсэн улс орнууд чинь одоо хаалганы зүг зааж байна. Одоо л гэнэт орос гэдгээ санав уу? Дэлхийн нисэх онгоцны буудлуудад дараалан зогсож "Бид Оросын иргэд шүү дээ! Бид хуулиараа иргэд нь" гэж тоосонд дарагдсан орос паспортаа далайлгаж гэнэ” хэмээн бичжээ. Тэрээр нэмэн “Эхлээд улс орон, ард түмнээ хүндэтгэж сур” гэв.

Түүний мэдэгдсэнээр Гадаад хэргийн яамнаас эх орондоо буцаж ирэх шаардлагатай иргэдийн “үнэн зөв” жагсаалтыг гаргаж, холбогдох байгууллагуудад тараах аж.

Эх сурвалж: Мария Захаровагийн албан ёсны фейсбүүк хуудас, uawire.org