БИЧЛЭГ: Коронавирусээр нас барагчдыг гэр бүлгүй хүмүүсийн оршуулгын газарт булж байна
Нью-Йорк хотын Харт арал дээр гэр бүлгүй, бүртгэлгүй, ядуу тарчиг хүмүүсийг булдаг оршуулгын газар бий. Харин одоо “Коронавирусийн улмаас нас барсан хүмүүсийг тэнд оршуулахаас өөр сонголтгүй боллоо” хэмээн хотын захиргааны хэвлэлийн төлөөлөгч пүрэв гаригт мэдэгдэв.
Саяхан ил болсон шинэ зургуудаас арваад хамгаалалтын хувцастай гэрээт ажилчид модон авснуудыг аварга булшинд булж байгааг харж болно.
Ихэнхдээ энэ оршуулгын газарт Рикер арлын шоронгийн хоригдлууд, Нью-Йорк хотын нэргүй, хамаатан садангүй хүмүүсийг оршуулах үүргийг хүлээдэг. Тэд долоо хоногт дунджаар 25 орчим авсыг булдаг байжээ.
Гэхдээ сүүлийн үед булах ажлыг хоригдлуудын оронд гэрээт ажилчид гүйцэтгэх болсон бөгөөд долоо хоногт нэг удаа ажилладаг байсан бол одоо таван өдөр болж нэмэгджээ.
Энэхүү шийдвэр нь коронавирусийн тархалтын улмаас хотын шарил хадгалах газрын багтаамжид тулгараад буй асуудлыг бууруулах зорилготой аж. Шинэ бодлогын талаар хотын Эрүүл мэндийн үзлэгийн албанаас “Одооноос бид цогцсыг 14 хоногийн хугацаанд хадгалаад, хэн нэгэн ирж авахгүй бол уг оршуулгын газар луу илгээх болно” хэмээн мэдэгджээ.
Эх сурвалж: nypost.com
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.