Америкийн фермерүүд сүүгээ асгаж, Нидерландад төмсөн овоо үүсжээ

АНУ-ын Висконсин мужийн нэгэн сүүний ферм коронавирусийн халдвараас болж өдөрт хэдэн арван мянган галлон сүү асгаж эхэлжээ. Цар тахлын улмаас зах зээл дээр нийлүүлэлтийн илүүдэл үүсээд байгаа нь сүүгээ хаях шалтгаан болсон байна. Энэхүү ферм өдөрт 25-30 мянган галлон сүү ус зайлуулах хоолойгоор урсган хаяж байгаа аж.

Ресторан, сургуулиудын үйл ажиллагаа хаагдсанаар сүү, цөцгийн тос, бяслаг боловсруулах үйлдвэрүүд логистик, баглаа боодлын том асуудалтай тулгараад байна. Сүүн бүтээгдэхүүнүүд маш хурдан мууддаг тул бусад хөдөө аж ахуйн гаралтай бүтээгдэхүүнүүдээс илүү хүнд байдалд оржээ.

“Хэдэн зуун мянган ресторан, сургууль, их дээд сургуулиуд хаагдсанаар бид асар том зах зээлийг алдаад байна" хэмээн Бяслаг үйлдвэрлэгчдийн холбооны гүйцэтгэх захирал Жон Умхофер хэлэв.

Гэвч сүүг хүмүүст үнэгүй тараавал сүүний салбарыг сүйрч болзошгүй гэж Умхофер үзэж байна. Иймд Хөдөө аж ахуйн яамнаас сүүг худалдан авч хэрэгцээтэй хүмүүст хандивлахыг хүсэж байгаа ажээ.

Үүнтэй адил шарсан төмсний эрэлт эрс буурснаар Нидерландын тариаланчид 1 тэрбум орчим кг төмсний овоотой үлдээд байна.

Нидерландад "Патат" гэгддэг шарсан төмс их алдартай ч коронавирусийн улмаас зоогийн газрууд гуравдугаар сарын дунд үеэс бүгд хаагдсанаар төмсний зах зээл нэг шөнийн дотор нуран унажээ.

Нэгэн хөдөө аж ахуйн байгууллага вирусийн дэгдэлтээс үүдэн нийт хөдөө аж ахуйн салбарт гарах хохирлыг зургаан тэрбум еврогоор үнэлжээ.

Эх сурвалж: tmj4.com, nytimes.com, reuters.com