Хойд хөршид өнгөрсөн хоёрдугаар сарын 1-нд коронавирусийн анхны тохиолдлоор Хятадын хоёр иргэн бүртгэгдэв. Халдвар авсан хүний тоо өчигдрийн байдлаар 114-д хүрчээ.

ОХУ-д халдвар авсан иргэдийн дунд бага насны хүүхэд байгаа бөгөөд түүнээс өвчний шинж тэмдэг илрээгүй боловч тээгч болсон байжээ. ОХУ халдварын тархалт нэмэгдэхээс сэргийлж гуравдугаар сарын 13-ны өдрөөс ХБНГУ, БНФУ, Итали, Испани Улс руу хийх нислэгийг хязгаарлах, бизнес, хүмүүнлэгийн болон албаны шугамаар зорчихоос бусад Италийн иргэдэд виз олголтыг түр хугацаагаар зогсоох шийдвэр гаргаад байна.

Мөн алба хаагчид вирусийн халдвар илрүүлэх оношлуураар бүрэн хангагдсан, нөхцөл байдал бүрэн хяналтад байгаа гэж мэдэгдэв. Даваа гарагт ОХУ-ын Засгийн газар тавдугаар сарын 1-н хүртэл гадаадын иргэдийг хилээрээ нэвтрүүлэхгүй болсноо бас зарлав.

Коронавирусийн тархалтаас урьдчилан сэргийлэх, таслан зогсоох арга хэмжээний хүрээнд их, дээд сургуулиудыг зайны сургалтад шилжүүлэх тухай ОХУ-ын Шинжлэх ухаан, дээд боловсролын сайд В.Фальковийн 2020 оны гуравдугаар сарын 14-ний өдрийн зөвлөмжийн дагуу тус улсын зарим их дээд сургууль цахимаар хичээллэх болоод байна.

Тэгвэл Казахстанд 1000 гаруй иргэн сурч, зорчиж байгаа бол ОХУ-д 2000 Монгол оюутан байдаг юм байна. Харин Казахстан болоод ОХУ хооронд зорчиж буй 300-аад иргэн байдаг гэсэн мэдээлэл бий.

Гадаад харилцааны сайд Д.Цогтбаатар “ОХУ-д байгаа манай оюутнууд гэр рүүгээ явна гэдгээ мэдэгдээд, Улаан-Үд рүү яваад эхэлсэн. Тэгэхээр Алтанбулагийн боомтоор орж ирнэ. Оюутнуудын хичээл хаагдаад, дотуур байрандаа байх боломжгүй болбол нутагтаа ирэхээс өөр аргагүй” гэсэн мэдээллийг өглөө.

Энэхүү арга хэмжээ хэрэгжиж эхэлснээр ОХУ-д суралцаж байгаа монгол оюутнууд болон монгол иргэд нутаг буцах тохиолдолд зөвхөн Монгол, Оросын хилийн авто замын Алтанбулаг-Хиагт, Цагааннуур-Ташанта боомтоор хил нэвтрүүлэхийг үүгээр мэдэгдэе. Эдгээр хоёр боомтоос бусад боомтоор улсын хил нэвтрүүлэхгүй.

Нутаг буцах хүсэлтэй иргэд Монгол Улсаас ОХУ-д суугаа ЭСЯ-ны Консулын хэлтэс, Эрхүү хотод суугаа Ерөнхий консулын газар, Улаан-Үд хотод суугаа Ерөнхий консулын газартай дараах утас, и-мэйл хаягаар холбогдож, дээр дурдсан боомтуудаар хил нэвтрэх тухайгаа урьдчилан мэдэгдэж бүртгэлд хамрагдсанаар хилээр саадгүй зорчих боломжтой:

Москва дахь ЭСЯ-ны Консулын хэлтэс Утас: +74992411548, +74956906792 Гар утас: +79162133247, И-мэйл хаяг: moscow12@mfa.gov.mn mongolconsul@gmail.com, Фэйсбүүк: Посольство Монголии в РФ

Эрхүү хот дахь Ерөнхий консулын газар Утас: +7 3952 342295 Гар утас: +7 914 895 0528 , И-мэйл хаяг: irkutsk@mfa.gov.mn Фэйсбүүк: Генеральное Консульство в Монголии в Иркутске РФ,

Улаан-Үд дэх Ерөнхий консулын газар Утас: +7(3012)220499 Гар утас: +79516224225, +79025337213, И-мэйл хаяг: ulan-ude@mfa.gov.mn, Фэйсбүүк: Улаан-Үд дэх Ерөнхий Консулын Газар

---