Сэрэмжлүүлэг: Гурван настай хүүхэд угаалгын машинд гацжээ

Онцгой байдлын ерөнхий газарт энэ сарын 15-нд нийт гал түймэр, аврах ажиллагааны нийт 16 дуудлага мэдээлэл ирснээс ихэнх нь гал түймрийн дуудлага эзэлжээ.

Тухайлбал байшин болон дээвэр, хашаа шатаж байна гэсэн дуудлага зургаа, автомашин шатаж байна гэсэн дуудлага хоёр, гэр шатаж байна гэсэн дуудлага дөрөв иржээ.

Үүнээс Дундговь аймгийн Дэлгэрцогт сумын Баянбулаг багийн “Сүүжийн энгэрийн бууц” гэдэг газарт малчин Г-гийн “Хьюндай портер” загварын ачааны автомашин, 4 ханатай гэр бүрэн шатсан байна. Уг гал түймэрт иргэн Г-гийн 2 гарын сарвуу бага зэрэг түлэгджээ.

Бага насны хүүхдүүд амарсан байгаа энэ үед хүүхдэдээ тавих анхаарлаа бууруулахгүй байхыг зөвлөж байна. Учир нь нийслэлийн Баянгол дүүргийн 3 дугаар хороонд хүүхэд угаалгын машинд гацсан байна гэсэн дуудлагыг өчигдөр 20:02 цагт хүлээн авчээ.  Нийслэлийн Аврах ангийн 8 алба хаагч, 2 автомашинтай 3 км замыг туулан 20:11 цагт очиж иргэн Б /3 настай, эрэгтэй/-г 16 минут ажиллаж аварч гарган эмнэлгийн анхны тусламж үзүүлж БГД-ийн Цагдаагийн 1 дүгээр хэлтэст шилжүүлэн өгсөн байна.

Түүнчлэн нийслэлийн Сонгинохайрхан дүүргийн 20 дугаар хороо, Оргил худалдааны төвийн эсрэг талд дулааны худагт цогцос байна гэсэн дуудлага иржээ. Тус худгаас нэр, нас тодорхойгүй эрэгтэй хүний цогцсыг гарган СХД-ийн Цагдаагийн 1 дүгээр хэлтэст шилжүүлэн өгчээ.