ЭЛЕКТОРАТ хөдөлгөөн ХҮН-МСДН-ын эвслийн нэр дэвшигчдийг дэмжинэ

"Зөв хүнийг, Зөв цагт нь дэмжье" уриалгыг дэвшүүлж буй Электорат хөдөлгөөнөөс Хөдөлмөрийн Үндэсний Нам болон Монголын Социал Демократ Нам эвсэн сонгуульд оролцох санамж бичиг байгуулж, Электорат хөдөлгөөнд хандсан хүсэлтийг хүлээн авч, цаашид уг эвслийг дэмжихээ илэрхийлж байна.

Хүмүүнлэг, иргэний ардчилсан нийгмийн төлөөх үзэл баримтлал, чиг хараа зэрэгцээ хоёр нам ийнхүү хөгжлийн бодлогын үзэл санаан дээр нэгдэн эвсэж 2020 оны УИХ-н сонгуульд оролцох болсон нь төр барих дээд байгууллагад зөв, боловсролтой, залуу нэр дэвшигчид өрсөлдөх боломжийг нэмэгдүүлж байна.

Хөдөлмөрийн Үндэсний Нам нь боловсролын төвшнөөрөө улсдаа тэргүүлэх залуусын хүсэл санаачилгаар бий болсон шинэ үеийн улс төрийн хүчин бол, Монголын Социал Демократ Нам нь байгуулагдсан цагаасаа цэвэр улс төрийг эрхэмлэж ирсэн нь улс төр, нийгэмд нэн хэрэгцээтэй байгаа зөв өөрчлөлтийг авч ирэх таатай суурь хүчин зүйл болж байна гэж бид үзэж байна.

Электорат хөдөлгөөн нь Монгол улсын Үндсэн Хуулийн үзэл санаа, үнэт зүйлсийг эрхэмлэн, ёс зүйтэй, шударга Улсын Их Хурлыг ард түмэнтэйгээ хамтран байгуулах зорилгоор байгуулагдсан эрх чөлөөт иргэдийн санаачилга юм.