“Эрдэнэс-Тавантолгой” ХК-ийн Төлөөлөн Удирдах Зөвлөл хувьцаа эзэмшигчиддээ ногдол ашиг өгөх шийдвэрээ танилцуулсан билээ. Нэгж хувьцаанд 90 төгрөг олгох бөгөөд 1072 ширхэг хувьцаатай иргэнд 96480 төгрөг оногдох юм.

Ногдол ашгийг ирэх тавдугаар сарын 20-ноос хойш олгож эхэлнэ хэмээн мэдэгдсэн билээ. Ингээд тус мэдэгдэл гарсантай холбоотойгоор иргэн танд “Эрдэнэс тавантолгойн” хэдэн ширхэг хувьцаатай болон үнэт цаасны компанид бүртгэлтэй эсэхийг мэдэх аргыг зааж өгье.

Иргэн таны хувьд 2011 онд ЭМД-ийн хишиг хүртэж, ЗГ-т хувьцаагаа зарж 300 000 төг авсан бол 741 ширхэг хувьцаа үлдэх юм.

• Энэ тухай мэдээллийг компанийн вэб сайт, пэйж хуудас болон “Эрдэнэс-Тавантолгой” апликейшн, 1072 пэйж хуудас, 1800-1072 тусгай утас гэсэн зөвхөн албан ёсны эх сурвалжаас авах шаардлагатайг албаныхан онцолсон юм.
• Та гар утасныхаа “Playstore”, “Аррstore”-оос “Эрдэнэс-Тавантолгой” гэж хайгаад нэгдсэн бүртгэлийн апликейшнийг татаж суулгах юм байна.
• Уг аппликейшнийг татаж авснаар иргэд хувьцааныхаа тоо ширхэгийг шалгах, хянах, мэдээ мэдээлэл авах, санал өгөх зэргээр ашиглаж цаашдаа ЭТТ компанитай хувьцаа эзэмшигчийн эүгээс холбогдох, хөрөнгийн зах зээлд оролцох бүрэн боломжтой болох юм.
• Хувьцаа эзэмшигч иргэн та  www.1072.ett.mn  сайтаар орж нэвтрэх хэсэгт дарж регистрийн дугаар болон утасны дугаараа оруулан нэвтрэх боломжтой.
• Данс шалгах хэсэгт орж “Эрдэнэс-Тавантолгой” компанийн хэдэн ширхэг хувьцаатай болохоо шалгахыг хүсвэл өөрийн регистрийн дугаараа оруулж шалгаарай. Мөн данс нээлгэсэн брокерын компаниа харж холбоо барих мэдээллийг авч болно.
• Үнэт цаасны компаниуд хэсэгт орж Монгол улсад үйл ажиллагаагаа явуулж буй брокерын компаниудын хаяг, байршил, утасны дугаар бүхий мэдээллийг авч холбогдон хувьцааны дансаа нээлгэж үйлчлүүлэх боломжтой. ЭНД дарж танилцана уу. 

Ногдол ашгийг иргэн таны үнэт цаасны компанид бүртгүүлсэн арилжааны банкны дансанд шууд шилжүүлэх юм. Иймд иргэн та үнэт цаасны компанид бүртгэлтэй бол тухайн компанид хандан та өөрийн идэвхтэй дансаа бүртгүүлсэн эсэхийг нягтлах хэрэгтэй.

Үнэт цаасны данс нээлгэхэд бүрдүүлэх материал:

Хүүхдэд данс нээлгэх бол төрсний гэрчилгээ
Насанд хүрсэн иргэд иргэний үнэмлэх
Данс нээгдсэн хураамж нэг хүний 5,000 төгрөг.

Ихэнх иргэдийн хувьд дансаа нээлгэсэн байсан ч бага насны хүүхдүүд болон гадаадад амьдардаг иргэд дансаа нээлгээгүй байгаа тул аль болох ногдол ашиг тараахаас өмнө нь "Эрдэнэс тавантолгой" ХК-иас анхааруулан хэлэв. 

---