В, С вирус тоолох эрхтэй 28 лабораторид шалгалт хийж эхэллээ

Манай сонин “Элэг бүтэн Монгол” үндэсний хөтөлбөрийн хүрээнд В, С вирус тоолохоор ЭМДЕГ-тай гэрээ байгуулсан 28 лабораторийн 15 нь шаардлага хангахгүй тоног төхөөрөмж, оношлуур ашиглан мэргэжлийн эмчгүй үйл ажиллагаа явуулж байсан зэргийг илчилсэн. Энэ хүрээнд “Элэг бүтэн Монгол” буюу лабораториудын мөнгө угаалт” цуврал нийтлэл бичиж, ЭМЯ, МХЕГ, лабораториуд, өвчтөний төлөөлөл оролцсон редакцын хэлэлцүүлэг зохион байгуулсан билээ.

Манай сонин “Элэг бүтэн Монгол” үндэсний хөтөлбөрийн хүрээнд В, С вирус тоолохоор ЭМДЕГ-тай гэрээ байгуулсан 28 лабораторийн 15 нь шаардлага хангахгүй тоног төхөөрөмж, оношлуур ашиглан мэргэжлийн эмчгүй үйл ажиллагаа явуулж байсан зэргийг илчилсэн.

Тэгвэл манай нийтлэлийн үр дүн эхнээсээ гарч, ЭМЯ-наас 28 лабораторид албан бичиг хүргүүлсэн байна. Тус бичигт “ЭМДЕГ-тай В, С вирусийн идэвхжил тодорхойлох шинжилгээ хийхээр гэрээ байгуулсан лабораториудын тусламж, үйлчилгээний чанарт эргэлзэх, лабораториудын чанарыг хянах нэгдсэн тогтолцоогүй гэх мэт шүүмжлэл гарч байна. Үүнтэй холбоотойгоор элэгний В, С вирус тоолох шинжилгээ хийж байгаа лабораториудын шинжилгээний хариу найдвартай байгаа эсэх, чанарын баталгаатай буй талаар тодруулга хийж, баталгаа хийх шаардлагатай байна. Иймд шаардлагатай мэдээлэл, баримт материалыг хавсралтын дагуу гарган 2020 оны хоёрдугаар сарын 20-ны дотор ЭМЯ-ны Эм, үйлдвэрлэл, технологийн газарт ирүүлнэ үү” хэмээжээ.

Ажлын хэсэгт ирүүлэх баримт, материалын жагсаалтад 2015 оноос хойш ХӨСҮТ-өөс зохион байгуулсан гепатитийн В, С вирусийн нуклейн хүчлийн тоон хэмжээ тодорхойлох Үндэсний чанарын гадаад үнэлгээ, Австралийн үндэсний лавлагаа лаборатори (NRL)-ийн үнэлгээ, олон улсын бусад чанарын үнэлгээнд оролцсон мэдээлэл болон чанарын гадаад үнэлгээнд хангалтгүй дүн авсан тохиолдолд засах, сайжруулах арга хэмжээ авсан тухай тайланг хавсаргах аж. 

Э.Эрдэнэцэцэг