Монголбанкнаас улбаатай ББСБ-ын сүлжээг шалгах УИХ-ын ажлын хэсэг гарч магадгүй

Эдийн засгийн байнгын хорооны өчигдрийн хуралдаанаар Монгол улсын Засгийн газар, Азийн хөгжлийн банкны хамтарсан хөтөлбөрийн санхүүжилтийн талаар хэлэлцэх үеэр УИХ-ын гишүүн Б.Дэлгэрсайхан “Иргэд банкны хүүнд дарлуулж байна. Зээлээ төлөхөөр хүүг нь урьдчилаад авчихаж байна. Монголбанкнаас улбаатай ББСБ-ын сүлжээ үүсчихлээ. Энэ бүлгийг анхаарахгүй бол болохоо байлаа. УИХ-аас ажлын хэсэг гаргаж болно” хэмээн мэдэгдсэн талаар “Зууны мэдээ” сонин иш татлаа.

Одоогоос яг нэг жилийн өмнө ikon.mn сайт ББСБ-д хувь эзэмшдэг төрийн албан тушаалтнуудын нэрийг зарлахад Монголбанканд хамаарал бүхий таван албан тушаалтан ББСБ-д хувь эзэмшдэг нь ил болж, төрийн байгууллагуудыг тэргүүлж байсан юм.

Тодорхой хэлбэл, Монголбанкны салбарын захирал Т.Ган-Од “Ялгуулагч” ББСБ-д, салбарын захирал Ц.Мөнхбаяр “Баруун Урт хөгжил” ББСБ-д, газрын захирал Т.Амарсайхан “Бат энд инвест” ББСБ-д, ахлах хянан шалгагч Д.Ганбат “Арвис-Итгэл” ББСБ-д, хэлтсийн дарга Б.Эрдэнэтуяа “Болд кредит” ББСБ-д хувь эзэмшдэг гэдгээ АТГ-т гаргасан ХОМ-тээ мэдүүлсэн байдаг.

Хэрэв УИХ-ын гишүүн Б.Дэлгэрсайханы ярьсан нь олонхийн дэмжлэг хүлээвэл УИХ-аас ажлын хэсэг гарч, Монголбанкнаас улбаатай ББСБ-ын сүлжээг шалгаж, олон нийтэд үнэн, бодитой мэдээлэл хүргэх нь.