ЭМЯ: Короновирусийн халдвар ахуйн болон амьсгалын замаар халдаж байна

БНХАУ-д анх гарснаас хойш хэд хэдэн улсад тархаад буй шинэ төрлийн коронавирусийн халдварын талаар ЭМЯ-наас мэдээлэл хийлээ. Өнөөдрийн байдлаар халдварын тохиолдол 440 болж нас барсан хүний тоо 9 болж өссөн байна. 

Яамны газрын дарга Д.Нарангэрэл, Эрүүл мэндийн яам ДЭМБ-тай байнгын холбоотой ажиллаж, энэ мэдээллээрээ шийдвэр гаргагчид болон холбогдох албан байгууллагуудыг мэдээллээр ханган ажиллаж байна.

Энэтхэг, Хонгконг улсаас ирсэн, халуурсан зургаан хүнийг тусгаарлан ХӨСҮТ-ийн лабораторид шинжлүүлэн, короновирусийн халдваргүйг тогтоосон.  

Короновирусийн халдвар ахуйн хавьтал болон агаар дуслын замаар дамжиж байна. Агаар дуслын замаар дамжиж байгаа тул хэн ч өвчлөх эрсдэлтэй. Тиймээс халдвар гарсан бүс рүү аль болох зорчихгүй байхыг ЭМЯ-наас анхаарууллаа. 

Уг өвчний шинж тэмдэг нь халуурч, бүх биеэр хөндүүрлэх, зарим тохиолдолд вирус нь уушгийг өвчлүүлснээс амьсгаа тасалдах байдлаар илэрч байгаа ажээ.

Түүнчлэн уг вирусээр дархлаа нь сул хүн амархан өвдөж, хүндэрч байгаа бөгөөд халдвар авснаас хойш 5-10 хоногийн дараа ханиалгах, цэр гарах, 38-аас дээш градус халуурах, амьсгаадах, гүнзгий амьсгаа авах үед цээжээр өвдөх, зүрхний цохилт нэмэгдэх, чичрэх зэрэг шинж тэмдэгээр илэрч байгаа аж.

ДЭМБ-аас гаргасан шуурхай зөвлөмжид: 

-Ямар нэгэн амьсгалын замын өвчлөл, ханиадтай хүнээс хол байх.

-Эмч нарын зөвлөмжийн дагуу гараа тогтмол зөв угаах.

-Мал нядалгааны газар, хүнсний зах зэрэг мал, амьтны боловсруулаагүй түүхий эд бэлтгэдэг, худалдаалдаг газруудаас хол байх.

-Ханиад, томуу болон амьсгалын замын ямар нэгэн өвчин туссан хүн бусдад халдаахгүйн тулд эрүүл ахуйн дэглэмийг чанд сахих.

-Эрүүл мэндийн байгууллагууд халдваргүйжүүлэлт, ариутгалын дэг журмыг чанд сахин мөрдөхийг анхааруулжээ. 

ЭМЯ-наас коронавирусийн халдвараас урьдчилан сэргийлэх бүх талын арга хэмжээ авч байгаа ч иргэд аль болон өвчлөл гарсан орон руу зорчихгүй байх, тухайн оронд зочилсон бол гараа тогтмол угаах, ариутгах, түүхий малын гаралтай болон загасны төрлийн мах идэхгүй байх, түүхий өндөгийг чанахаар бол сайтар угаах зэрэг зөвлөмжийг өгөв.