Москва дахь аюулаас хамгаалах хүчний удирдах байр халдлагад өртжээ

Оросын нийслэл Москва хотод төвтэй Холбооны аюулаас хамгаалах хүчний байранд буудалцаан гарч, халдлагад өртсөн тухай мэдээлжээ. Автомат буугаар зэвсэглэсэн этгээд Оросын тагнуулын төв байрны хаалгаар нэвтэрч гал нээн замын хөдөлгөөн зохицуулагч цагдаагийн офицерыг хороож, таван хүнийг шархдуулсан тухай Интерфакс агентлаг дамжуулсан байна.

Аюулгүйн хүчнийхэн халдлага гарсан бүсийг хамгаалалтад авчээ. Ерөнхийлөгч Владимир Путин жил бүр олон нийтэд хандан мэдэгдэл хийдэг уламжлалын дагуу хэвлэлийн хурал хийснээс хойш хэдхэн цагийн дараа буюу орон нутгийн цагаар пүрэв гарагийн орой 18 цагийн үед уг халдлага болсон гэж эх сурвалж мэдээлжээ.

Зэвсэгтэй этгээд Лубянка барилгын доод давхрын хүлээн авах хэсэгт гал нээсэн байна. Уг барилгад Холбооны аюулгүйн хүчин буюу Зөвлөлтийн үед тагнуулын гол үйл ажиллагааг гардан гүйцэтгэж байсан КГБ-ын төв байрладаг ажээ. Гэмт этгээд халдлага үйлдсэнийхээ дараа хажуугийн барилга руу зугтаж, түүнийг араас нь нэхэж буудаж хөнөөсөн тухай эх сурвалжууд мэдээлсэн байна.

Холбооны аюулгүйн хүчнээс эхэндээ зэвсэгтэй гурван этгээд халдлага үйлдэж, хоёрыг нь буудаж шархдуулж, гурав дахь этгээд зугтаж байгаад амиа алдсан гэж мэдээлж байснаа дахин залруулсан нь энэ юм.

Гэмтэж шархадсан хохирогчдын дунд байгаа цагдаагийн хоёр офицерын биеийн байдал хүнд байна гэж Оросын Эрүүл мэндийн яамнаас мэдэгджээ. Аюулаас хамгаалах хүчин эрүү үүсгэн хэргийг мөрдөн шалгаж эхэлсэн бөгөөд тусгай хүчний офицерыг хороохыг завдсан гэж үзсэн байна. Мөн халдлага Ерөнхийлөгч Путины дөрвөн цаг үргэлжилсэн илтгэлтэй холбоотой эсэхийг шалгаж байгаа ажээ.

Өнөөдөр буюу баасан гарагт ОХУ-д аюулаас хамгаалах тусгай хүчний ажилтнуудын өдрийг тэмдэглэх байсан юм.

Эх сурвалж: www.bbc.com, www.theguardian.com