Венесуэл улс НҮБ-ын Хүний эрхийн зөвлөлд сонгогдлоо
НҮБ-ын Хүний эрхийн зөвлөлийн гишүүнээр Венесуэл улс сонгогджээ. Уг мэдээг ялтан өөрөө шүүгчдийн бүрэлдэхүүнд багтсантай адил үйл явдал боллоо хэмээн зарим хэвлэлүүд онцолж байна.
Учир нь Венесуэл улс ойрын жилүүдэд хүний эрхийг хамгийн их зөрчиж буй улс орнуудын нэг болсон ч НҮБ-ын Ерөнхий Ассамблейд явуулсан нууц санал хураалтаар Коста Рикатай өрсөлдөж 105:96 гэсэн саналын харьцаатайгаар ялжээ.
Венесуэлийн Гадаад хэргийн сайд Хорхе Арреаза Каракас хотод мэдэгдэл хийж АНУ болон түүний холбоотнуудын харгис ширүүн явуулгыг үл ойшоож Хүний эрхийн зөвлөлд сонгогдсон нь түүхэн үйл явдал хэмээн тэмдэглэсэн байна.
Өнгөрсөн долдугаар сард НҮБ-ын Хүний эрхийн дээд төлөөлөгч Мишель Бачелет Венесуэлийн Ерөнхийлөгч Николас Мадурогийн Засгийн газрыг ард иргэдэд хүргэх хүнсний тусламжийг улс төрийн зорилгоор ашигласан нь хүний эрхийг зөрчиж буй үйлдлийг нотолж байна хэмээн буруутгажээ.
Түүнчлэн Ливи, Судан зэрэг хүний эрх зөрчдөг гэх шүүмжлэлд өртсөөр ирсэн улс орнууд ямар ч маргаангүйгээр зөвлөлд суудал эзэлсэн байна. НҮБ-ын Хүний эрхийн зөвлөлд 47 орон сонгогдож гурван жилийн хугацаатайгаар дэлхийн улс орнуудын хүний эрхийн асуудлуудыг шийддэг юм.
Эх сурвалж: www.cnn.com
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.