Энх тайвны 100 дахь Нобелийн шагналыг Этиоп улсын Ерөнхий сайд Абий Ахмед хүртлээ

Норвегийн Нобелийн шагналын хорооны дарга хатагтай Берит Рейс Андерсен манай цагаар 17 цагт, Ослогийн цагаар үдээс өмнө 11 цагт зуу дахь энх тайвны Нобелийн шагналын эзнийг зарлалаа. Энэ жилийн Нобелийн энх тайвны шагналд 200 гаруй хувь хүн, 100 орчим байгууллага өрсөлдөж Этиоп улсын Ерөнхий сайд Абий Ахмед шалгарлаа.

Тэрээр олон улсын хамтын ажиллагаа, энх тайвны төлөө хүчин чармайлт гарган ажиллаж Этиоп, Эритрей улсуудын хилийн зөрчил маргааныг шийдвэрлэх чухал санаачилга гарган юм. Нобелийн шагналын хороо Ерөнхий сайдын хичээл зүтгэл олон зуун хүний аж амьдрал, ирээдүйг аварсан хэмээн үнэлжээ. 

Абий Ахмед Ерөнхий сайдаар сонгогдохоос өмнө хоёр улсын хилийн маргаан 20 орчим жил үргэлжилж хилийн дагуух бүс нутагт эдийн засаг, хүмүүнлэгийн асар их хэмжээний гарз хохирлыг учруулаад байсан юм. Хилийн маргаан намжиж, дайн дуссанаар гэр бүлүүд эргэн нэгдсэн учир Абий маш зоригтой, гайхалтай алхам хийсэн гэж шагналын хорооны шүүгчид үзжээ.

43 настай Этиоп улсын Ерөнхий сайд саяхан хөрш Судан улс дахь улс төрийн хямралын дараах энхийн хэлэлцээрт чухал үүрэг гүйцэтгэсэн гэж олон улсын ажиглагчид үзсэн байна. Тэрээр зөвхөн улс орондоо төдийгүй Африкийн бүсэд энхийг сахиулах их үйлс нь дөнгөж эхэлж байгаа ажээ.

Нобелийн энх тайвны шагналтныг нэрлэхээс өмнө олон улсын эх сурвалжууд Австралийн Ерөнхий сайд Жакинда Ардерн, Бразилийн уугуул иргэдийн төлөөлөгч Амазоны ширэнгэн ой хамгаалагч Раони Метуктир болоод 16 настай цаг уурын өөрчлөлтийн эсрэг тэмцэгч Грета Тунберг нар хүчтэй өрсөлдөгчид хэмээн нэрлэж байсан юм.

Эх сурвалж: www.cnn.com, www.theguardian.com