Союз хөлөг ослын буулт хийжээ

Өчигдөр Казакстаны Байконурын сансрын буудлаас Союз хөлөг АНУ-ын сансар судлаач Ник Хэг, Оросын сансрын нисгэгч Алексэй Овчинин нарыг Олон улсын сансрын станц руу хүргэхээр хөөрчээ. Гэвч Союз хөлөг хөөрөөд минут 54 секундын дараа пуужингаас салж ослын буулт хийсэн байна. Хөлгийн бүхээг Байконураас 400 км-т 34 минутын дараа шүхрээр буужээ.

Олон улсын сансар судлалын станцад зургаан сарын үүрэг гүйцэтгэхээр хөөрсөн ч төд удалгүй ослын буулт хийсэн Америк, Оросын сансрын нисгэгчдийн биеийн байдал сайн байгаа гэдгийг эх сурвалжууд мэдээлж байна. НАСА болон Роскосмос сансрын агентлагууд нисгэгчдийг газардсан даруйд нисдэг тэргээр шүхэрчдийг буулгаж яаралтай тусламж үзүүлжээ. Эсэн мэнд газардсан судлаачдыг эргэн ирэхэд гэр бүлийнхэн нь баяртайгаар угтан авлаа.

Орос болон Америкийн мэргэжилтнүүд өчигдөр хөөрсөн Союз хөлөгт чухам ямар гэмтэл гарч аваарын дохио ирснийг нягтлан шалгаж байна. Сансрын нисгэгчдийг хөөрөх үед доош татсан мэдрэмж төрөх ёстой байтал эсрэгээр жингүйдэж эхэлсэн байна. Энэ хооронд хөлгийн аврах систем ажиллаж бүхээгийг пуужингаас салгажээ.

Союз хэдий ашиглаад удсан ч хамгийн аюулгүй сансрын хөлгүүдийн нэг. Хөлөгт ямар алдаа гарсныг нягтлан тогтоогоогүй тохиолдолд Оросын Засгийн газар хөлгийн аюулгүй байдлын талаар ямар нэг тайлбар хийхгүй гэжээ. Олон улсын сансрын станцад ажиллаж байгаа Герман, Орос, Америкийн сансар судлаачид өчигдөр болсон явдлаас үүрэг гүйцэтгэх хугацаагаа сунгахаар болов.

Сансар  судлалын хамтын ажиллагаа Орос, Америкийн харилцааг ойр дотно барьж байгаа чухал салбар. Энэ харилцаанд ямар нэг байдлаар нөлөөлөхгүй гэв. Союз хөлөг 1983 онд ийм ослын буулт хийж байжээ. 

Тэгвэл сансар судлалын түүхэнд гарсан золгүй явдлуудаас дурдвал:

-1967 онд Аполло 1 хөлөг хөөрөх тавцан дээр шатаж дотор нь байсан багийн гурван хүн хөлгийн хамт шатжээ

-Мөн онд Союз 1 хөлгийн шүхэр гацаж нэг нисгэгч амиа алдсан байна

-1971 онд Союз 11 хөлөг хөөрөх үедээ хүчилтөрөгчөө алдаж багийн дөрвөн гишүүн бүхээгт амиа алдсан байдалтай олдож байжээ

-1986 онд Челленжер хөлөг хөөрсний дараа хэдэн хэсэг болж бутран долоон сансар судлаач амиа эрсэджээ

-2003 онд Колумбиа хөлөг хөдөлгүүрээс салсны дараа дэлхийн агаар мандалд эргэн бууж дотор нь байсан долоон хүн амь үрэгдсэн байна.