Хэрэв таны өвдөг өвддөг бол...

Өвдөгний үений үрэвсэл яаж үүсдэг вэ?

Өвдөгний үений үрэвсэл нь: Биеийн жин ихсэх, ажлын нөхцөл, насжилт, удамшил зэргээс шалтгаалан өвдөгний үений мөгөөрс гэмтэж, үүний улмаас өвдөлт болон өвдөгний үеийн хөдөлгөөн хязгаарлагдах, мөн өвдөгний булчингийн хүч сулрах юм уу чангарснаар тухайн хүнд хөдөлгөөний бэрхшээл үүсдэг.

Өвдөгний үеийн үрэвслийн үед дасгал хөдөлгөөн хийх нь өвчний улмаас үүсэх алхах, шатаар өгсөх, уруудах зэрэг хөдөлгөөний бэрхшээлээс сэргийлэн өдөр тутмын амьдралын үйл ажиллагааг сайжруулна.

Өвдөгний үений үрэвслийн үед голчлон хийгддэг дасгалаас орууллаа:

Дасгал 1. Гуяны арын булчингийн сунгалт

Заавар: Нэг хөлөө шулуун жийж хоёр гарыг өвдгөн дээрээ тавьсан байрлалд гуяны арын булчин татагдах мэдрэмж төртөл 2 гарыг урагш явуулж тэр байрлалдаа 10-15 секунд бариад хөлөө суллаж амраана. Дасгалыг хийхдээ өвдгөөр нугалахгүй шулуун байлгана.

Ач холбогдол: Өвдөгний остеортритын үед гуяны арын булчин чангарснаар өвдөгний үений даралтыг нэмэгдүүлж өвдөлтийг ихэсгэдэг.

Дасгал 2. Гуяны урд талын булчингийн хүчийг сайжруулах дасгал

Заавар: Сандал дээр суусан байрлалд хөлөө өвдгөөр тэнийлгэн танхиман доороо алчуур ивж доош дарахдаа өвдгийг тэнийлгэнэ.

Ач холбогдол: Өвдөгний үений өвдөлтийн үед гуяны урд талын булчингийн хүч ихээр буурдаг. Үүний улмаас шатаар өгсөж, уруудахдаа бэрхшээлтэй болдог. Энэ дасгал нь үенд ачаалал бага өгч булчингийн хүчийг сайжруулахад ач холбогдолтой.

Дасгал 3. Гуян урд талын булчингийн хүчийг сайжруулах дасгал

Заавар: Нуруугаараа хана налах ба 2 хөлдөө мөрний хэмжээний зай авч хананаас нэг алхам орчим зай авч зогсоно. Энэ байрлалаас доош хагас сууж 5-10 секунд болоод дээш босно.

Дасгал 4. Түнхний үеэр нугалагч булчингийн хүчийг сайжруулах дасгал

Заавар: Нэг хөлийг нугалж хэвтсэн байрлалд нөгөө хөлийг дээш шулуун өргөж агаарт 1-2 секунд бариад буулгана.

Ач холбогдол: Түнх нугалагч булчингийн хүч сайжирснаар алхах үеийн бэрхшээл багасна.

Дасгал 5. Түнхний үеэр холдуулагч булчингийн хүчийг сайжруулах дасгал

Заавар: Хажуу тийш харж хэвтсэн байрлалд доод хөлийг нугалж хэвтэнэ. Дээд хөлийг шулуун дээш өргөж буулгах замаар хийнэ.

Ач холбогдол: Түнх өвдөгний үений үрэвслийн үед түнхний холдуулагч булчингийн хүч буурч үүний улмаас алхах үед ганхсан алхаа үүсдэг.

Дасгалын санамж:

-Дасгал хийхдээ зөв хийх.

-Дасгал хийж байх үед өвдөлт ихсэх, толгой эргэх, дотор муухайрах шинж тэмдэг илэрвэл дасгалыг зогсоох.

-Дасгалыг тодорхой дэс дараатай, тоотой, цаг минуттай хийх.

-Дасгалыг өдөрт 2-3 удаа хийнэ. Дасгалыг нэг удаа хийхдээ 5-10, 15-20 удаа хийх ба аажмаар тоог нь нэмэгдүүлэн ачаалалыг тохируулан хийнэ.

-Хэрвээ танд эдгээр дасгалыг хийхэд бэрхшээлтэй бол хөдөлгөөн засалчаас зөвлөгөө авч дасгалын хэлбэрийг өөрчилж болно.