35 сая ам.долларын татварын асуудлыг Арбитрын шүүх рүү шилжүүлнэ

ЗГХЭГ-ын дарга, Монгол улсын сайд Г.Занданшатар өнөөдөр Төрийн ордонд хэд хэдэн асуудлаар мэдээлэл хийлээ. Түүний ярьснаар Монгол улсыг нэгдсэн төсвийн тэнцэл 291,3 тэрбум төгрөгийн ашигтай гарсан байна. 

Монгол улсын эдийн засгийг хөгжүүлэх үндсэн чиглэлийн хэрэгжилт 50,9 хувь, эдийн засгийн өсөлт 6,3 хувьд хүрчээ. Нэгдсэн төсвийн тэнцэл 291,3 тэрбум төгрөгийн ашигтай гарсан гэнэ. Харин инфляцийн түвшин найман хувьд хүрсэн нь олон улсын зах зээл дээр нефтийн үнэ өсч, дэлхийн худалдааны дайнаас шалтгаалж валютын ханш өссөн зэргээс үүдэлтэй. Ажилгүйдлийн түвшин буурч 7,5 хувьд хүрсэн гэж ЗГХЭГ-ын дарга Г.Занданшатар хэллээ. 

Мөн гадаадын шууд хөрөнгө оруулалт 879 сая ам.доллараар өссөн. Монгол улсын гадаад өр 22,7 их наяд байсан бол одоо 21,1 их наяд болж буурчээ. 

БНХАУ-ын хилийн боомтын нэвтрэх чадвар нэмэгдэж, нүүрсний экспорт хоёр дахин өссөн. Оны эхний хагас жилийн байдлаар 1,4 тэрбум ам.долларын нүүрс экспортолсон байна. Оны эцэст энэ үзүүлэлтийг 4 тэрбум ам.долларт хүргэхийг зорьж байна хэмээн мэдээллээ.

“РИО ТИНТО”-ТОЙ ТОХИРОЛЦЖЭЭ

Монгол улсын засгийн газар Оюутолгойн гэрээ хэлцлийг сайжруулах зорилгоор энэ оны нэгдүгээр сараас эхлэн олон удаагийн яриа хэлэлцээрийг “Рио Тинто” компанитай хийсэн. Монголын талын ногдол ашиг хүртэх өгөөжийг наашлуулах, санхүүгийн, зээлийн хүүгийн дарамтыг бууруулах асуудлуудаар хэлэлцээр хийж таван үндсэн зарчмаар тохиролцон, харилцан ойлголцлын санамж бичиг зурахаар шийдэлд хүрчээ. Ингэснээр Оюутолгойн гэрээ илүү ашигтай болох суурь нөхцөл бүрдэж байна гэж үзэж байгаа аж.

ТАВАН ТОЛГОЙН ОРДОД ЦАХИЛГААН СТАНЦ БАРИНА

Монгол улс жилдээ 150 сая ам.долларын цахилгаан эрчим хүч импортоор авдаг. Монгол улсын Засгийн газраас Тавантолгойн ордод цахилгаан станц барьж, Оюутолгойг дотоодоос эрчим хүч авах ёстой гэсэн байр суурин дээр байгаа.  Энэ асуудал зарчмын шийдэлд хүрч ахиц дэвшил гарчээ. 

Мөн “Рио Тинто” компаниас 35 сая ам.долларын татвар төлүүлэхээр шаардсан ч татварын акт дээр санал зөрөлдөөнтэй байгаа учраас Арбитрын шүүх дээр эцэслэн шийдвэрлэх гэнэ. Нийт 150 сая долларын асуудал хөндөгдөж байгаа аж.

Мэдээллийг бүрэн эхээр нь энэ холбоосоор хүлээн авч үзнэ үү!