Б.Амархүү покер тоглож хожсон Бенц машиндаа мансуурч байгаад баривчлагджээ

ЦЕГ-ын Хар тамхитай тэмцэх газрын алба хаагчид өчигдөр орой 24.00 цагийн үед Буриад Улсын Гавьяат Жүжигчин, дуучин Борхүүгийн Амархүүг Хан-Уул дүүргийн нутаг дэвсгэрт хар тамхи хэрэглэсэн үед нь дайчлан баривчилжээ.

Дуучин Б.Амархүү хар тамхи, мансууруулах төрлийн ямар бодисыг биедээ авч явсан, хэчнээн хэмжээний мансууруулах бодистой явсан, хэдэн хүнийг холбогдуулан дайчлан баривчилсан эсэхийг албаны эх сурвалжаас тодруулахад “Өчигдөр шөнө шилжих үед дуучин Б.Амархүүг баривчилсан. Түүнд хар тамхины сорьц тавьж үзэхэд хэрэглэсэн гэдэг тогтоогдсон. Хэдий хэмжээний бодис биедээ хадгалж байсан нь мөрдөн байцаалтын нууц учраас хэлэх боломжгүй. Биед нь байсан хар тамхины нэр төрлийг тодруулахаар лабораторид шилжүүлсэн байгаа. Тэрбээр баривчлагдах үедээ ганцаараа байсан. Нэг зүйлийг нэмж хэлэхэд Б.Амархүү өмнө нь хар тамхи, мансууруулах бодистой холбоотой хэрэгт холбогдож шалгагдаж байгаагүй” гэв.

ЦЕГ-ын Хар тамхитай тэмцэх газраас хар тамхи мансууруулах бодистой холбоотой хэргийг илрүүлэхээр идэвхтэй гүйцэтгэх ажиллагааг явуулах явцдаа Б.Амархүүг илрүүлэн баривчилсан байна. Тэрбээр баривчлагдах үедээ ОХУ-ын «Победи Покер Старс» шоунд оролцож хожсон час улаан өнгийн бенц машиндаа мансуурсан байдалтай байжээ.  

Б.Амархүүд Хан-Уул дүүргийн Эрүүгийн хэргийн анхан шатны шүүхээс  нэг сарын хугацаатай цагдан хорих таслан сэргийлэх арга хэмжээ авах шийдвэр гаргасантай холбогдуулан түүнийг ШШГЕГ-ын харьяа Цагдан хорих 461 дүгээр ангид хорьжээ. Цагдаагийн байгууллагаас дуучин Б.Амархүүд Эрүүгийн хуулийн тусгай ангийн 20.7 дугаар зүйлийн 1 дэх хэсэгт зааснаар эрүүгийн хэрэг үүсгэж, яллагдагчаар татан шалгаж байгаа аж. Хэрвээ шүүхээс Б.Амархүүг гэм буруутай гэж үзвэл эрүүгийн хуульд заасны дагуу нэг жилээс таван жил хүртэл хугацаагаар зорчих эрхийг хязгаарлах, эсхүл нэг жилээс таван жил хүртэл хугацаагаар хорих ял эдлэх юм байна.

Дуучин Б.Амархүүг баривчилж байгаа нь