LIVE: Авлигач Н.Баярсайхан, Э.Аззаяа нарын хэргийг анхан шатны шүүхээр дахин хэлэлцэхээр боллоо

Өнөөдөр Нийслэлийн эрүүгийн хэргийн давж заалдах шатны шүүх МХЕГ-ын Экспорт, импорт, хилийн хорио цээрийн газрын дарга асан Н.Баярсайхан, хэлтсийн дарга асан Э.Аззаяа нарын 25 хүнд  холбогдох хэргийг шүүх хурал боллоо.

Дээрх этгээдүүд хурдан муудах шинж чанартай хүнсний бүтээгдэхүүн импортлогч иргэн, аж ахуйн нэгжийг хясан боогдуулан замаар нэг тэрбум орчим төгрөгийн авлига авч, түүнийг гэр болон албан байгууллагынхаа өрөө тасалгаанд хадгалсан байсныг АТГ-ын Мөрдөн шалгах хэлтсийн ажилтнууд 2017 онд илрүүлж шүүхэд шилжүүлснийг Чингэлтэй дүүргийн Эрүүгийн хэргийн анхан шатны шүүх хөөн хэлэлцэх хугацаа дууссан байна гэж дүгнээд 2019 оны тавдугаар сарын 07-ны өдөр хэрэгсэхгүй болгон хааж байлаа.

Харин уг шийдвэрийг прокурор эсэргүүцэж давж заалдах шатны шүүхэд эсэргүүцэл бичсэнийг өнөөдөр Нийслэлийн давж заалдах шатны шүүх бүрэлдэхүүн хэлэлцээд прокурорын эсэргүүцлийг үндэслэлтэй байна гэж үзлээ.

Улмаар Чингэлтэй дүүргийн эрүүгийн хэргийн анхан шатны шүүхийн шийдвэрийн тогтоох хэсгийг бүхэлд нь хэрэгсэхгүй болгож, Н.Баярсайхан, Э.Аззаяа нарын 19 хүнд холбогдох хэргийг анхан шатны шүүхэд буцааж, зургаан шүүгдэгчийн хэргийг тусгаарлан прокурорт шилжүүлж, шийдвэрлэлээ.