Дансанд нь орж ирсэн 120,000 ам.долларыг үрсэн хосыг баривчилжээ

Пенсильванийн жижиг хотод амьдардаг гэр бүлийн дансанд банкны алдаатай шилжүүлгээс болж 120,000 ам.доллар орж иржээ. Санамсаргүй байдлаар орж ирсэн мөнгийг үрсэн хосыг цагдаагийн газраас санаатайгаар хулгайн гэмт хэрэг үйлдсэн хэмээн буруутгаж байна. Тэд их хэмжээний мөнгө эх сурвалж нь тодорхойгүй байдлаар орж ирсэн бол банк аль эсвэл цагдаагийн газартай холбогдох ёстой байсан гэж үзжээ.

Гэвч Роберт болон Тиффани Уильямс нар 120,000 ам.долларыг бараг бүгдийг нь буюу 107,000 ам.долларыг үрж, үрсэн мөнгөө эргүүлэн төлөх шаардлагатай болсон байна. Тиффанигийн ярьснаар хос SUV автомашин, дөрвөн дугуйт зэрэг өөрсдийн дуртай зүйлсийг худалдаж авахаас гадна 15,000 ам.долларыг найзууддаа өгчээ.

BB&T банкны теллер Жеоржиа мужийн үйлчлүүлэгчийн мөнгөн гуйвуулгыг хийхдээ алдаа гаргаж буруу данс руу шилжүүлсэн байна. Тавдугаар сарын 31-ний өдөр үйлчлүүлэгчийн илгээсэн мөнгө эзэндээ очоогүй гэдгийг банкинд мэдэгдсэнээс хойш цагдаагийн мөрдөн шалгах ажил эхэлжээ.

Банкны удирдлага хостой холбогдох гэж хэд хэдэн удаа оролдсон ба уг мөнгийг өөрсдийнх нь биш гэдгийг мэдэж байсан гэнэ. Хосыг баривчлан саатуулж 25,000 ам.долларын барьцаанд сулласан байна.

Эх сурвалж: www.cnn.com