ХБНГУ-д энэ оны тавдугаар сард 70 кг геройний төрлийн мансууруулах бодис тээвэрлэж яваад баригдсан БНТУ-ын Истанбул дахь Ерөнхий консулын газарт ажилладаг дипломат ажилтан, Тагнуулын дэд хурандаа Б.Баттүшиг болон жолооч С.Эрдэнэбаяр нарт холбогдох хэргийг шалгаж дуусаад Дрезден хотын прокурор энэ сарын 12-ны шүүхэд шилжүүлсэн гэдгийг Германы n-tv.de мэдээллийн сайт мэдээллээ.

Хар зах дээр гурван сая еврогийн үнэ хүрэх онц их хэмжээний хар тамхи тээвэрлэж явсан Монголын дипломат ажилтнуудыг шүүх хурлын тов удахгүй гарна гэдгийг тус сайт мэдээлсэн  боловч яг хэзээ гэдгийг бичээгүй байв.

Монгол Улсын дипломат албаны нэр хүндийг дэлхий дахинд шившиг болгосон дээрх хоёр албан тушаалтныг өнгөрсөн зургадугаар сарын 19-ний өдөр ажлаас нь чөлөөлсөн гэдгээ Гадаад харилцааны сайд Д.Цогтбаатар мэдэгдсэн бол ТЕГ-аас дээрх хүмүүс ХБНГУ-ын хуулиар шийтгэгдэнэ гэдгийг хэлсэн билээ.

---