Дональд Трамп Хонконгийн асуудлаар Ши Жиньпинтэй уулзах хүсэлт тавьжээ

Хонконгт гурван сарын хугацаанд үргэлжилж буй жагсаалыг тайван замаар шийдвэрлэж, намжаах хүсэлтээ АНУ илэрхийлсэн. Хилийн ойролцоо Хятадын армийн хагас цэрэгжүүлсэн цагдаагийн бие бүрэлдэхүүн байрлалаа эзэлснийг хиймэл дагуулын зургаар батлан мэдээлсний дараа Ерөнхийлөгч Дональд Трамп байр сууриа хараахан илэрхийлээгүй байсан юм. Өнөөдөр өглөө Трамп өөрийн Твиттер хуудсаар дамжуулан Хятадын дарга Ши Жиньпинд уулзах хүсэлтээ илгээжээ.

Тэрээр "Хятадын дарга Ши Жиньпинийг би сайн мэднэ. Тэр бол ард түмнийхээ хүндлэлийг хүлээсэн агуу удирдагч. Ши дарга Хонконгийн нөхцөл байдлыг хүнлэг энэрэнгүй сэтгэлээр түргэн шуурхай шийдвэрлэхийг хүсч байгаа гэдэгт эргэлзэхгүй байна. Тэр чадна. Хувийн уулзалт хийвэл ямар вэ?" хэмээн жиргэсэн байна. 

Тайван жагсаал мягмар гарагаас лхагва гарагт шилжих шөнө жагсагчид болон цагдаа нарын мөргөлдөөнөөр үргэлжилсэн ба даваа гарагт Хонконгийн олон улсын нисэх буудлын үйл ажиллагаа тасалдсанаас дэлхийн улс орнууд аялагч зорчигчдод сэрэмжлүүлэг өгсөн. Хятадын арми Хонконгийн хил давбал 30 жилийн өмнө 1989 онд Тяньаньминий талбайд болсон цуст хядлага давтагдаж болзошгүй тухай Америкийн Ерөнхийлөгчийн үндэсний аюулгүй байдлын зөвлөх Жон Болтон Voice of America-д ярьжээ. Түүний хэлснээр Америкийн ард түмэн өнгөрсөн түүхийг мартаагүй гэжээ.

Эх сурвалж: www.bbc.com