Бизнес итгэлийн индекс сүүлийн 6 жилийн хугацаанд анх удаа эерэг дүнтэй гарчээ

Бизнес итгэлийн ерөнхий индекс 2018 онд 0.47 гарсан нь сүүлийн 6 жилийн хугацаанд анх удаа эерэг үзүүлэлт болж байгаа ажээ. Бизнес итгэлийн индекс эерэг утгатай байгааг эдийн засгийн өсөлт, төслүүдийн бүтээн байгуулалттай холбон тайлбарлажээ.

Судалгаанд оролцсон бизнес эрхлэгчдийн 54 хувь нь бизнесийн ерөнхий орчин өмнөх жилээс сайжирсан, дунджаар 24 хувь нь  макро эдийн засгийн орчин сайжирсан гэж үзсэн байна. 

Энэ судалгааг МҮХАҮТ-аас 18 дахь жилдээ зохион байгуулж байгаа бөгөөд бизнесийн орчны ерөнхий төлөв байдал, хөрөнгө оруулалтын орчин, аж ахуйн нэгжүүдийн ашиг орлого, макро эдийн засгийн үндсэн асуудал болох ядуурал, ажилгүйдэл, инфляцийн талаар бизнес эрхлэгчдийн байр суурь, цаашид хэрхэн өөрчлөгдөх талаар хүлээлт, бизнесийн  орчны сайжруулбал зохих асуудлууд зэрэг үзүүлэлтүүдээр бизнесийн орчныг үнэлэх зорилгоор хийдэг байна. 

Судалгааг нийт 845 бизнес эрхлэгчдийн дунд ярилцлага ба онлайн хэлбэрээр явуулсан бөгөөд тэд ашиг, орлогын үзүүлэлт нь 2017 онд 25 нэгж хувийн өсөлттэй гарч байсан бол 2018 онд  58 хувь нь ашиг орлого өмнөх оноос тодорхой хэмжээнд өссөн гэжээ.

Хөрөнгө оруулалтын үзүүлэлт 2018 онд өмнөх оноос 20 нэгж хувиар өссөн бол 2019 оны хөрөнгө оруулалт хийх тухай хүлээлт нь өмнөх оноос 1 нэгж хувиар буурчээ.