Олон улсын жүдо бөхийн холбооны (IJF) уламжлалт томоохон тэмцээн болох Тбилисийн гран при тэмцээн хоёр дахь өдрөө амжилттай зохион байгуулагдлаа. 

Тэмцээний хоёр дахь өдөр эрэгтэйчүүдийн -73кг, -80кг, эмэгтэйчүүдийн -63кг, -70кг жингийн барилдаануудаар үргэлжлэн явагдсан ба манай улсаас МУГТ Г.Одбаяр тэргүүтэй гурван бөх барилдаж эрэгтэйчүүдийн -73кг жинд МУГТ Г.Одбаяр шагналт тавдугаар байранд шалгарлаа. 

Эрэгтэйчүүдийн -73кг жинд дэлхийн аваргын хүрэл медальт МУГТ Г.Одбаяр өчигдөр дараах барилдаануудыг хийж шагналт байранд шалгарлаа.  

• С хэсгийг тэргүүлэн барилдсан тул эхний тойрогт гоц мөргөж хоёрдугаар тойрогт Энэтхэг улсын жүдоч Висхал Рухилтэй барилдан торгуулиар цэвэр ялсан.

• Гуравдугаар тойрогт тэмцээнийг зохион байгуулагч эзэн орны Гиорги Чихелидзетэй барилдан нэмэлт цагт цэвэр ялсан.

• Хэсгийн аваргын төлөө Францын Чаине Гуиллауметэй барилдан ялагдаж дагах барилдаан хийхээр болсон. 

• Дагах барилдаанд Гүржийн Лаша Гиунашвилитэй барилдан торгуулиар цэвэр ялснаар хүрэл медалийн төлөө барилдах эрхтэй болсон юм. 

Хүрэл медалийн төлөө мөн Гүржийн Валери Иашвилитэй барилдан "ялагдаж" шагналт байранд шалгарлаа.