Жүдо бөхийн Дьюселдорфийн их дуулга тэмцээн албан ёсоор эхэллээ. Гурав хоногийн турш үргэлжлэн явагдах тэмцээний эхний өдөр уламжлал ёсоор хөнгөн жингийн барилдаануудаар эхлэх юм. Монгол улсаас өнөөдөр Монгол улсын хөдөлмөрийн баатар, МУГТ Д.Сумьяа тэргүүтэй шилдэг таван жүдоч барилдаж гурван бөх маань медалийн төлөө барилдах эрхтэй боллоо. Тодруулбал эмэгтэйчүүдийн -57кг жинд Д.Сумьяа аварга, эрэгтэйчүүдийн -66кг жинд Ё.Басхүү нар хүрэл медалийн төлөө барилдах бол эмэгтэйчүүдийн -52кг жинд Л.Сосорбарам аваргын алтан медалийн төлөө барилдах эрхтэй болсон юм.
Өнөөдөр манайхны салхийг хагалж эрэгтэйчүүдийн -66кг жинд “Хилчин” спорт хорооны тамирчин Ё.Басхүү эхний тойрогт Гуинеа Биссау улсын тамирчин Цезарь Диоготой урамтай сайхан барилдан давсан билээ. Уг барилдааныг үзэхийг хүсвэл энд дарна уу. Тэрээр дараах барилдаануудыг хийжээ.
- Хоёрдугаар тойрогт Алжир жүдоч Эззине Вайлтай барилдахаар гарч ирээд хэдхэн секундэд цэвэр дарлаа. Энэхүү барилдааныг үзэхийг хүсвэл энд дарна уу.
- Гуравдугаар тойрогт дэлхийн аваргын хүрэл медальт Израилын Фликер Талтай барилдан илүүрхэн ялсан.
- С хэсгийн аваргын төлөө ОХУ-ын Шамилов Якубтай маш сайн барилдсан хэдий ч нэмэлт цаг дээр харамсалтайгаар ялагдсан.
- Дагах барилдаанд Казакстаны жүдоч Есет Куановыг нэмэлт цагт ялснаар хүрэл медалийн төлөө Молдавын Денис Вьерутай барилдах гэж байна. Молдавын тамирчны хувьд 3388 оноотойгоор дэлхийн чансааны 10-т эрэмбэлэгдэж буй шилдэг жүдоч бөгөөд хэдхэн хоногийн өмнө Парисын их дуулга тэмцээний -66кг жинд түрүүлсэн тамирчин юм.
Медалийн төлөөх барилдааныг шууд үзэх:
Жич: Хэрэв та шууд дамжуулалтыг үзэж амжаагүй бол дээрх бичлэгүүдийг ухраан нөхөж үзэх боломжтой.
